Creideann Comhchoiste na Gaeilge nach raibh Páipéar T2 Ghaeilge na Sraithe Sóisearaí, mar a leagadh amach i mbliana é, oiriúnach don fheidhm a bhí leis

Tá an Comhchoiste tar éis cuireadh a thabhairt don Ghréasán do Mhúinteoirí Gaeilge agus do mhúinteoirí éagsúla ó chontaetha ar fud na tíre, a léirigh a n-imní faoin bpáipéar mar atá sé a leagtha amach faoi láthair, chun an t-ábhar tábhachtach seo á phlé leis.

Tosóidh an cruinniú ag 13.30 i Seomra Coiste 4, TL 2000, Teach Laighean.

Dúirt Cathaoirleach an Chomhchoiste, an Teachta Dála Aengus Ó Snodaigh: “Is sna meánscoileanna Béarla a bhaineann páipéar T2 na Gaeilge, agus is iad na daltaí nach bhfuil an Ghaeilge á húsáid acu mar a gcéad teanga atá sé dírithe. Dá bharr sin tá dualgas orainn a chinntiú go dtugtar an-chúram agus an páipéar seo á leagan amach sna blianta ar aghaidh. Tá orainn a chinntiú go bhfuil caighdeán ar leith ag teastáil chun dul i ngleic leis an bpáipéar seo agus go bhfuil a fhios ag na daltaí agus ag na múinteoirí Gaeilge roimh ré cad atá i gceist agus cad atá an córas ag súil leis uathu. Ní tharla sé sin i mbliana agus chuir na míthuiscintí a tharla isteach go mór ar na daltaí. Tá mo Chomhchoiste ag iarraidh, trínár mbreithniú ar an ábhar seo amárach, a chinntiú nach dtarlóidh a leithéid arís.”

Tá 14 Chomhalta, naonúr ó Dháil Éireann agus cúigear ó Sheanad Éireann, mar Chomhaltaí den Chomhchoiste na Gaeilge, na Gaeltachta agus Phobal Labhartha na Gaeilge.

Is féidir an cruinniú, i Seomra Coiste 4 a fheiceáil beo ar Teilifís an Oireachtais.

Chomh maith leis sin, is féidir imeachtaí an Chomhchoiste a fheiceáil ar aip fhónchliste Thithe an Oireachtais, a bhfuil ar fáil ó ghléasanna Apple agus Android.