Is dóig liomsa go bhfuilimid uilig ar an tuairim chéanna leis an Teachta Ua Maolchatha, go mba cóir ceist na Gaeltachta do thaighdeadh agus d'fhiorsrú go cúramach. Ach ní dóigh liom go ndéanfadh sé aon mhaitheas dúinn na staitisticí agus mar sin do bhailiú, mar sílim go bhfuil cuid mhaith eolais againn, ní amháin ó na figiúirí atá againn ó Thuarascáil na Roinne Oideachais agus na tuarascáil eile atá le fáil, ach ó n-ár n-eolas féin. Tá an t-eolas san againn ó na daoine go bhfuil baint acu leis an nGaeltacht.
Mar gheall ar an nGaeltacht bheith dá cumhangú agus labhairt na Gaeilge ag trádh inti, tá fáthanna ann go bhfuil na Béarla ag dul i dtreise. Tá cúrsaí an tsaoil i gcoitcinne ag cur isteach ar mhuinntir na Gaeltachta. Tá oideachas maith acu anois agus tá páipéir nuaíochta ag teacht isteach chúca. Tá cuairteoirí ag teacht isteach sna ceanntracha san, tá an radió le cloisteáil, tá a lán teacht agus imeacht agus mar sin de. Ní háit iargcúlta í an Ghaeltacht feasta. Tá teacht agus imeacht ann i gcómhnaí agus mar sin brúann an Béarla isteach, agus brúifidh sé, is dóigh liom, inár n-eanneoin.
Tá rud eile, freisín, atá anathábhachtach. Má táimíd chun ár ndicheall a dhéanamh chun leigheas fháil ar an dtrádh atá ar siúl sa bhFíor-Ghaeltacht. Tá daoine údarásacha, dála dochtúirí agus gárdaí, agus ní hí an Ghaeilge is móa chleachtaid i gcúrsaí gnótha. Cleachtann siad a gcuid gnótha trí Béarla. Ní maith an socrú postanna oifigiúla do thúirt do dhaoine gan Gaeilge, ach ní héasca teacht ar réitheach faoi sin. Is deacair na daoine oiriúnacha d'fháil, agus níl aon neart air sin. Má bhíonn duine le Gaeilge riachtanach don bpost agus gan Gaeilgeoir ar fáil, caithfear an post a líonadh agus tugtar don duine is fearr é.
Mar gheall ar Scéim an Dá phúnt, gí gur thug sé cúonamh maith stopann sé ar ceithre bliana déag d'aois. Ní bhfaghann páiste thairis sin an dá phúnt, agus tá an scéal díreach mar ata sa nGalltacht. Níl aon ghreim ceart ar na daoine óga nuair a fhágann siad an scoil. Sin fhadhb mhór atá le réiteach.
Tá leas na Gaeilge san nGaeltacht ag brath ar staid na Gaeilge agus ar an urraim atá ag dul dí sa nGalltacht. Ní féidir an scéal do léiriú go fírinneach ma deantar deis na Gaeilge sa nGaeltacht do dheighilt amach ón dtreo ina bhfuil sé sa nGalltacht. Mara bhfuil an Ghaeilge ag dul ar aghaidh mar is ceart, ag leathnú amach agus ag dul i dtreise agus i neart sa chuid eile den tír, mara bhfuil cruthú ann go bhfuil sí faoi mhódh agus faoi ghradam ag an bpobal lasmuigh den Ghaeltacht, ní ceart, is dóigh liom, bheith ag súil go mbeidh dúil ag lucht na Gaeltachta, fiú amháin, intí mar budh chóir. Tá a fhios acu siúd, a bhfuil oideachas ortha, nach bhfuil iontu ach dorn beag daoine, na daoine is boichte sa tír ina gcómhnaí sna ceanntracha is iargcúlta, is fiaine agus is neamh-thorthúla sa tír. Isé an locht is mó a gheibhtear orthu go minic ná nach bhfuil siad ag déanamh gach uile iarracht chun iad féin agus a gclann a chur ar aghaidh sa tsaol. Ní thig linn, mar sin, bheith ag súil go mbeidh cuspóirí árda neamhshaolta acu, mar go dtí seo is i gcruatan agus in annró do mhair said.
Ní daoine gan loighic muintir na Gaeltachta, agus nuair a chíonn siad gur Béarla a labhras furmhór mór lucht maoine agus cumhachta agus údaráis sa tír, tagaid ar an dtuairin go bhfuil baint ag an dá rud le chéile agus ní fhéadfaimís aon mhilleán a chur orthu nuair a deireann siad leo féin gur ionnan eolas ar Bhéarla agus dul chun cinn san tsaol. Sin mar a bhí agus sin mar atá fós le cuid mhaith de na cainteoirí dúthcais, agus is amhlaidh a bhéadh an scéal linn féin. B'fhéidir nach bhfuil an scéal chomh dona ón taobh sin de is do bhí tríocha blian ó shoin, ach tá an Ghaeilge ag trádh gach uile bhliain le laghdú líon na nGaeilgeoirí féin. Tá líon na ndaoine agus líon na bpáistí scoile ag tuitim agus ag dul i laghad ar fud na tíre ar fad, taobh amuigh de na bailtí móra. Idir an dá linn, ó tháinig an Rialtas Gaelach insteach, tá rud eile ag cur isteach go mór ar chúrsaí na Gaeilge sa nGaeltacht. Tá na páipéirí nuaíochta na cuairteoirí agus na rudaí sin ag cur in a gcoinnibh ó lá go lá agus ag fáil treise in aghaidh an lae go minic.
Mar sin, ceapann a lán de na daoine sa nGaeltacht—agus, mar aduirt mé, ní fhéadaimís milleán a chur orthu— mar is ceist eacnoimíochta í go minic —gur úsáidí go mór an Béarla ná an Ghaeilge. Chíonn siad gur beag post sa tír seo, gan bacaint le tír eile, is féidir le duine a fháil gan eolas maith aige ar an mBéarla, agus tá dúil mhór aca ann dá réir. Tá siad uilig oilte ar í labhairt agus í a léamh agus a scríobhadh anois. Caithfear dúil sa nGaeilge níos mó ná dúil sa Bhéarla do mhúscailt iontú, agus béidh sé deacair fiú amháin an Ghaeltacht mar atá sí fé láthair ins na ceanntracha san a choinneáil. Is ionadh liomsa ag cuimhneamh dom ar na rudaí atá i gcoinnibh na Gaeilge, agus is forsaí móra iad—go bhfuilimid ag plé leo le fiche bliain anuas, go bhfuil an méid sin den Ghaeltacht againn fós, gí gur beag é i gcomparáid leis an méid a bhí ann leath-chéad bliain ó shoin. Sé an tuairim atá agamsa ar an gceist ná gur ceart dúinn na daoine do spreagadh agus dea-shampla a thaspáint go bhfuil meas againn uilig ar an nGaeilge. Má cheapaimidne go bhfuil sé de dhualgas orainn cuidiú léi, agus má táimíd uilig ag iarraidh cabhrú léi, beidh lucht na Gaeltachta ag leanúint don deaghshompla san.
Ní fheicimse gur gá dhúinn statistíochta níos cruinne ná iad san atá ar fáil againn a bhailiú chun go mbeidh sé ar ár gcumas ceist na Gaeltachta a phlé, agus í a phlé go hiomlán. Níl aon eolas againn faoi chionas a bailitear na figiúirí a chuireann an Brainse Staitistíocht amach ach tá na figiúirí ón Roinn Oideachais scrúdaithe agam. Taspánann siad go bhfuil líon na ndaltaí scoile ins na ceanntracha Fíor-Gaeltacha ag tuitim. Sílim go bhfuil na figiúirí a thug an Teachta Ua Maolchatha dúinn i gceart ón taobh sin, agus go bhféadaimís féin usáid a bhaint as na figiúirí sin. Acht nílim cinnte fiú amháin an labhrann na páistí scoile uilig an Ghaeilge sna scoileanna sin. Nuair áirítear scoil, mar scoil sa bFhíor-Ghaeltacht áirítear mar sin í maidir le buntaistí agus bónais toisc an chuid is mó de na páistí san scoil sin bheith ar a gcumas an Ghaeilge a labhairt níos fearr ná an Bhéarla. B'fhéidir mar sin nach bhfuil sé chomh láidir agus a ceapaimid ó na figiúirí sin. Mar sin fhéin, sílim gurb iad na figiúirí is fearr atá againn. Má théigheann cigirí ag fiosrú i dtaobh na bpáistí agus ag cur na bpáistí faoi scrúdú béil agus ag fáil cibé faisnéis is féidir féachaint an bhfuil an Ghaeilge á labhairt sa bhaile acu. Sna blianta idir 1933-34 agus 1943-44 bhí laghdú sa neán-tinareamh sna scoileanna sa bFhíor-Ghaeltacht. Bhí an laghdú san 10 fán gcéad i nGaillimh, 18 i Muigheo agus Tír Chonaill, 27 i gCorcaigh agus 40 i gCiarraighe.