Tairgim:
Go ndeonfar suim nach mó ná £375,980 chun slánaithe na suime is gá chun íoctha an mhuirir a thiocfaidh chun bheith iníoctha i rith na bliana dar críoch an 31ú lá de Mhárta, 1962, le haghaidh Tuarastail agus Costais Roinn na Gaeltachta, maille le Deontais le haghaidh Tithe agus Ildeontais-i-gCabhair.
Taispeánann an Meastachán don bhliain seo méadú de £41,240 glan ar an soláthar a rinneadh don bhliain seo caite. Sé an chúis is mó atá leis an ardú sin ná méadú de £31,300 a bheith sa soláthar le haghaidh Tithe Gaeltachta agus méadú de £16,400 a bheith sa soláthar le haghaidh Scoláireachtaí Saoire agus Scoile sa Ghaeltacht. Tá méadú de £5,000 sa soláthar le haghaidh Coláistí Gaeilge agus tá méadú de £9,525 sa soláthar do Thuarastail agus Costais na Foirne. Ina gcoinne sin, áfach, tá laghdú de £20,000 sa soláthar do Scéimeanna Feabhsúcháin sa Ghaeltacht.
Éiríonn an breis-soláthar do Thuarastail agus Chostais Taistil toisc a bheith riachtanach don Roinn foireann sa bhreis a fhostú chun déileáil leis an méadú in obair na dTithe a tháinig de thoradh an Achta nua a ritheadh sa bhliain 1959. Fairis sin do b'éigean don Roinn post tar-uimhreach do Phríomh-Oifigeach a chur lena teachlachas mar tá Príomh-Oifigeach tugtha ar iasacht do Ghaeltarra Éireann. Ina chás siúd, áfach, aisghnófar ó Ghaeltarra Éireann an tuarastal a híocfar leis an bPríomh-Oifigeach sin ón Vóta seo agus glacfar an t-airgead a haisghnófar amhlaidh chun creidis mar Leithreasa-i-gCabhair don Vóta — Fo-mhírcheann N 3.
Faoi Fho-Mhírcheann C déantar soláthar le haghaidh deontas faoi Achtanna na dTithe (Gaeltacht). Sa bhliain airgeadais 1960/61 críochnaíodh 167 dtithe nua, feabhsaíodh 300 tithe, cuireadh soláthar uisce i 149 dtithe, cuireadh saoráidí séarachais i 145 tithe, cuireadh seomraí folcaidh feistithe le huisce te i 113 tithe, feabhasaíodh an córas sláintíochta i 4 tithe, agus rinneadh méadú speisialta ar 19 dtithe. Fritheadh ós cíonn 2,100 iarratais nua i rith na bliana, is é sin 500 níos mó ná sa bhliain roimhe, agus tháinig méadú mór ar an líon cásanna inar tosnaíodh ar an obair. Ceadaíodh deontais de luach tuairim is £217,000 i thart ar 1,700 cásanna i gcomparáid le deontais de £126,000 in 800 cásanna sa bhliain airgeadais roimhe sin. Cuireadh tús le Scéim na Seallaí Saoire agus Scéim na mBrúnna agus táthar ag súil go rachaidh na Scéimeanna sin chun cinn go maith sna blianta atá romhainn.
Tháinig méadú arís ar an gcaiteachas faoi na hAchtanna ó £84,864 i 1959/60 go £136,000 i 1960/61. Is léir ó na figiúirí atá tugtha agam cheana go mbeidh méadú arís ar an obair sa bhliain airgeadais seo agus meastar gur gá £181,000 a sholáthar chuige i mbliana.
Is cúis sásaimh dom an dul ar aghaidh atá á dhéanamh sa ghné seo d'obair na Roinne agus an feabhas atá ag teacht dá bharr ar chúrsaí sa Ghaeltacht.
Is as Fo-mhírcheann D a cuirfear an t-airgead ar fáil i mbliana le haghaidh Scéimeanna Feabhsúcháin sa Ghaeltacht. Rinneadh soláthar de £150,000 do na scéimeanna sin anuraidh ach níorbh fhéidir ach timpeall dhá dtrian den soláthar sin a chaitheamh mar níorbh fhéidir scéimeanna áirithe a thabhairt chun críche chomh luath agus a bhí beartaithe. Meastar anois gur leor £130,000 in aghaidh na bliana le haghaidh na Scéimeanna sin. Tá súil agam gur ag dul i bhfeabhas a bheidh an taobh sin den scéal feasta.
D'ainneoin an laghduithe sa soláthar, áfach, ba mhaith liom a rá go mbeidh mé toilteanach gach scéim rathúil a molfar don Ghaeltacht a mheas go báúil agus nach gcuirfear aon mholadh fiúntach i leataoibh cheal airgid.
Tá na Scéimeanna Feabhsúcháin sonraithe i gcuid a III den Mheastachán. Chífear go bhfuil an soláthar céanna á dhéanamh i mbliana le haghaidh na mbóthar agus a rinneadh anuraidh. Is do bhóithre áise is mó atá an soláthar seo agus sa bhliain seo caite, d'íoc an Roinn £31,000 as bóithre áise agus timpeall £5,000 as bóithre contae. Tá an-éileamh i gcónaí ar na hoibreacha sin.
Tá ísliú de £5,000 sa soláthar a moltar i mbliana le haghaidh uisce-sholáthair nó séarachais. Níor caitheadh ar na scéimeanna sin anuraidh, áfach, ach timpeall £10,000 — sé sin timpeall £9,400 ar scéimeanna móra réigiúnacha agus timpeall £600 ar mhion-scéimeanna. Ní mór glacadh leis go mbíonn moill ag gabháil le hullmhú scéimeanna fairsinge i gcúrsaí uisce-sholáthair agus nach féidir bheith ag súil leis go mbeidh cásanna aibidh i mbliana le haghaidh níos mó ná an £20,000 d'íoc astu. Is eol dom, ámh, go bhfuil go leór réamhoibre á dhéanamh fé láthair i ndáil le húllmhú scéimeanna nua a bhéas ag teacht isteach i ndiaidh a chéile amach anseo.
Le haghaidh na muir-oibreacha moltar an soláthar céanna i mbliana agus a rinneadh anuraidh. Caitheadh timpeall £12,500 ar na hoibreacha sin an bhliain seo caite agus táthar ag súil le dul ar aghaidh mar an gcéanna i mbliana.
Níl ach £15,000 á sholáthar i mbliana do na Tithe Gloine i gcomparáid le £30,000 anuraidh. Caitheadh thar £20,000 ar na tithe gloine anuraidh; ar an bhfiche teach atá á dtógáil i gConamara agus an dá theach déag i dTuar Mhic Éadaí. Táthar sásta gur leor an soláthar de £15,000 don obair atá le déanamh i mbliana.
Trí mhíle, cúig céad punt atá á sholáthar i mbliana faoi Scéim na Muc. Dáileadh 75 chráin san iomlán anuraidh agus táthar ag súil le 113 chráin a dháileadh i mbliana.
Tá ísliú sa soláthar don Scéim Solais agus Teasa. Ceapadh an scéim seo le haghaidh na n-oileán nach féidir an leictreachas a sholáthar dóibh mar atá á dhéanamh don tuaith i gcoitinn ach táthar tar éis riachtanais na n-oileán sin a shásamh anois agus níl gá le níos mó ná soláthar comharthach don scéim i mbliana. Ní miste a mhíniú gur chuir an Roinn bun-trealamh solais agus teasa ar fáil faoin Scéim do thuairim 650 teaghlaigh ar na hoileáin Ghaeltachta agus gur ghlac na teaghlaigh uile go fonnmhar leis an Scéim. Tuigtear dom chomh maith gur cheannaigh suas le leath na dteaghlach sin trealamh breise dhóibh féin.
Chífear go bhfuil méadú de £2,500 san iomlán a moltar le haghaidh Meánscolaíochta. Tá san áireamh i mbliana scéim nua trína gcabhróidh an Roinn le húdaráis meánscoileanna sa Ghaeltacht chun cóir taistil a chur ar fáil do dhaltaí a mbíonn aistear fada le déanamh acu chun freastal ar mheánscoil. Íocfaidh an Roinn suas go dtí 80% de chostas ceadaithe na seirbhísí iompair.
Táthar ag moladh £7,500 le haghaidh Hallaí Siamsa i mbliana. Tá sé seo níos ísle ná an soláthar a rinneadh anuraidh ach tá forbairt na scéime seo níos moille ná mar a bhí coinne leis agus ní raibh de chaiteachas uirthi anuraidh ach £3,750. Táthar sásta de gur leor an soláthar de £7,500 i mbliana.
Tá méadú de £2,000 sa soláthar do scéimeanna ilghnéitheacha. Áirítear iontu siúd taitneamhachtaí cosúil le páirceanna imeartha, linnte snámha, piniúirí liathróid láimhe agus a leithéid a chur ar fáil do mhuintir na Gaeltachta. Tá san áireamh iontu freisin trialacha talmhaíochta a ceapadh le haghaidh maoth-thorthaí agus fataí luatha a fhás sa Ghaeltacht, agus is astu a tabharfar cúnamh airgid i leith aon togra eile a nglacfar leis i rith na bliana.
Ba mhaith liom ar an ócáid seo mo bhuíochas a ghabháil arís leis na Coistí Áitiúla, na Coistí Talmhaíochta Contae, na Comhairlí Contae agus na heagraíochta eile a chomhoibríonn leis an Roinn chun na Scéimeanna Feabhsúcháin éagsúla atá luaite agam a chur i bhfeidhm.
Faoi fho-mhírcheann E den Mheastachán tá £2,000 á sholáthar arís i mbliana chun deontais bheaga a thabhairt le haghaidh imeachtaí cultúrtha agus sóisialacha, mar shampla, deontais le haghaidh Feiseanna agus Féilí Drámaíochta agus cúnamh airgid chun oirnéisí ceoil agus a leithéidí a chur ar fáil do Choistí Áitiúla sa Ghaeltacht.
Tá £48,000 dá sholáthar faoi fho-mhírcheann G le haghaidh an deontais £5. Níl aon athrú anseo ón soláthar a bhí ann anuraidh.
Chífear go bhfuil méadú go dtí £10,000 sa soláthar faoi fho-mhírcheann H le haghaidh Coláistí Gaeilge sa Ghaeltacht. Cé nár caitheadh ach timpeall leath an tsoláthair a bhí ann chuige sin anuraidh meastar go mbeidh riachtanas leis an suim sin i mbliana.
Moltar soláthar de £100,000 a dhéanamh i mbliana mar Dheontas-i-gCabhair do Ghaeltarra Éireann. Is ionann an soláthar sin agus an méid a híocadh le Gaeltarra Éireann anuraidh mar Dheontas-i-gCabhair. Féadfaidh na Teachtaí eolas a fháil faoi imeachtaí an Bhoird le linn na bliana 1959/60 ó Thuarascáil agus Cuntais an Bhoird don bhliain sin a tíolacadh don Oireachtas le déanaí, amhail mar a foráltar le Alt 31 (5) agus Alt 32 (1) den Acht Um Thionscail na Gaeltachta, 1957. Cé go dtaispeánann na Cuntais sin go raibh laghdú sna díolacháin sa bhliain 1959/60 tuigtear dom go bhfuil feabhas ag teacht ar an scéal sin de réir a chéile anois, cé gur féidir nach mbeidh an feabhas sin le tabhairt faoi deara sa Tuarascáil agus Cuntais don bhliain 1960/61 a tíolacfar don Oireachtas chomh luath agus is féidir é i mbliana.
Níl aon athrú ar an soláthar a moltar le haghaidh Taispeántas Drámaíochta Gaeilge agus ní dóigh liom gur gá dom aon rud a rá faoi.
Faoi fho-mhírcheann M den Mheastachán tugtar cúnamh do Choistí Áitiúla chun scoláireachtaí saoire sa Ghaeltacht a thabhairt do pháistí ó áiteanna lasmuigh den Ghaeltacht. Le roinnt bliana anuas tá líon na bpáistí a bhíonn páirteach sa scéim sin ag dul i méid agus i mbliana tá soláthar de £10,050 á mholadh di i gcomparáid le £8,600 a soláthraíodh anuraidh. Fairis sin do cuireadh scéim thrialach ar siúl anuraidh trínar chuir Gael-linn timpeall 300 páistí ag freastal ar scoileanna éagsúla sa Ghaeltacht ar feadh téarma scoile amháin do gach páiste. Tá beartaithe an scéim sin a leathnú i mbliana ionas go gcuirfear suas le 1,050 páistí chuig scoileanna Gaeltachta — gach páiste acu ar feadh téarma scoile amháin. Íocfaidh mo Roinn deontas nach mó ná £19 le haghaidh gach páiste, faoi réir uasteora de £19,950. Mar sin, idir an dá chuid den scéim seo, beidh £30,000 san iomlán ag teastáil i mbliana.
Is sontasach an feabhas a tháinig ar shaol mhuintir na Gaeltachta faoi rialú dúchasach. Is beag teach scoile sa bhFíor-Ghaeltacht go mb'éigean é a dhúnadh cheal dóthain tinrimh — ach b'éigean cuid acu a fhairsingiú de bharr méadú líon na ngasúr. Má tá eolas níos fearr acu ar an mBéarla anois, tá sé amhlaidh de dhroim bearta oideachais a ceapadh amach d'aonturas chuige sin. Ach níl siad ag tréigint na teangan náisiúnta agus ní thréigfidh an fhad is a bhéas Éire fré chéile gníomhach chun a hathbheochana.
Chíonn siad go bhfuil fás marthannach gach uile Shamhradh i ndiaidh a chéile ar líon na bhfoghlaimeoirí a thaganns mar chuairteoirí ina measc. Scaipeann na cuairteoirí seo a lán airgid ar fud na Gaeltachta. Ní bheidh mé sásta go mbeidh chuile theaghlach sa nGaeltacht ag coinneál foghlaimeoirí, Samhradh i ndiaidh Samhraidh, agus cuid mhaith acu á gcoinneál i rith na bliana chomh maith.
Is ionann sábháil na Gaeltachta agus scaipeadh na Gaeilge ar fud na tíre. Má tugtar suas den iarracht cé thógfadh ar mhuintir na Gaeltachta tabhairt suas freisin? Tá eolas anois ag aos óg na hÉireann ar dhá theangain, agus táimid ag teannadh leis an am nuair a bhéas an oiread Gaeilge ag lucht na Béarlachta is atá de Bhéarla ag lucht na Gaeltachta. Is é an t-oideachas an tairbhe is marthannaí agus is buaine is féidir a chur ar fáil do aos óg na Gaeltachta.
Ar an ábhar sin tá meánscolaíocht dá soláthar dóibh. Ar an gcaoi seo béidh sé ar a gcumas chur isteach ar chuid mhaith de na postanna oifigiúla agus tráchtálacha atá coibhrithe don sórt sin scolaíochta agus, dá bharr sin, coinneofar tuilleadh acu in Éirinn. Teastaíonn an t-oideachas leanúnach, freisin, leis an mbrabach is fearr a bhaint as a bhfuil de bheartaíocht ann do leas gheilleagrach na taoibhe sin tíre. I ndáil leis seo, béidir go mbeidh sé inspéise a lua go bhfuil liaison curtha ar bun idir an Roinn agus an Foras Talúntais.
Is cúis sásúlachta liom nach bhfuil gníomhacht an Fhorais coibhrithe don Achréidh, ach go bhfuil spéis faoi leith aige i saothrú an tsléibhe agus an phortaigh, agus tuiscint dá réir sin aige dó. Is obair fhoighdeach í seo, ach le cabhair an Fhorais agus comhar na gcomharsan beifear ag súil le toradh maith uaithi.
Tá an dubhshraith bainte, agus táthar ag tógáil uirthi. Tuigeann muinntir na Gaeltachta go bhfuil an oighreacht náisiúnta is uaisle ina gcúram siadsan. Táim sásta go bhfuil meas ag an gcuid eile den náisiún ar an oighreacht sin. Má déantar gníomh de réir an mheasa sin, déanfaidh cúpla glúin eile le cúnamh Dé, Gaeltacht den tír fré chéile.