D'íoc an Roinn as costas na bhfearaistí speisialta a bhí ag teastáil do na hionaid sin chomh maith leis an gcostas a ghaibh leis na seomraí a chur in oiriúint ó thaobh cúrsaí fuaime dhe. Ina theannta san d'íoc an Roinn tuarastal na múinteoirí le linn dóibh bheith san Iolscoil, a dtáillí Iolscoile, agus tuarastal na n-ionadaithe a bhí fostaithe acu.
Tá súil agam go dtabharfar na fígiúirí agus na fíricí sin fé ndear acu san adeireann nach bhfuilimid ag déanamh aon rud chun oideachas a thabhairt dóibh sin go bhfuil máchail orthu. Níor mhaith liom leis ligint don ócáid seo dul thart gan moladh ar leith a thabhairt don obair iontach atá á dhéanamh ag stiúrthóirí agus ag múinteoirí na scoileanna speisialta so. Níor leor aon fhocla chun cur síos a dhéanamh ar a ndíogras agus a ndúthracht.
MEANOIDEACHAS.
Trí mhilliún, céad is daichead míle, seacht gcéad is caoga púnt an t-iomlán glan atá á sholáthar le haghaidh meánoideachais, suim atá timpal is £280,000 níos mó ná soláthar na bliana airgeadais seo caite. Siad na príomhnithe is cúis leis an méadú sin ná deontais caipitíochta agus deontais saotharlainne do na scoileanna, tuarastail múinteoirí agus scoláireachtaí breise le haghaidh daltaí na Gaeltachta.
Ins an scoilbhliain seo, tá thar 80,000 dalta ar rollaí na meánscoileanna aitheanta. Ocht mbliana déag ó shoin—ins an bhliain 1943-44—ní raibh líon na ndaltaí sna meánscoileanna ach go díreach, thart ar leath an fhigiúir sin. I gcaitheamh na n-ocht mbliana déag sin méadaíodh ar líon na meánscoileanna ó 377 go 542, comhartha é sin nach do na liomatáistí cathrach amháin a bhí meánscolaíocht á cur ar fáil ach go raibh sí i rith na tréimhse sin á leathadh go dtí gach cuid den tír. I rith na dtrí bliana seo caite tá líon na ndaltaí ag fás de réir 3,600 sa bhliain agus má leanann an ráta fáis sin, beidh thar 100,000 dalta sna meánscoileanna faoi an mbliain 1970.
An méadú de dhaichead is £46,200 ar sholáthar na bliana airgeadais, 1961-62, le haghaidh deontas, idir dheontais caipitíochta agus deontais do na scoileanna A agus do na scoileanna dátheangacha, léiríonn an méadú sin cé chomh mór is atá an líon daltaí aitheanta ag dul i méid.
Chun freastal ar na daltaí sin teastaíonn tuilleadh múinteoirí agus ins an scoilbhliain seo sé an líon muinteoirí atá ag fáil breistuarastail ná 3,381 i gcomparáid le 3,234 ins an mbliain 1960-61. Ina theannta sin, tá 204 mhúinteoir ag fáil an fhorliúntais speisialta de £200 le haghaidh múinteoirí atá ag fáil breistuarastail ná eadh i gcríoch ón chéad lá de Lúnasa seo caite. Mar sin, tá beagnach 3,600 múinteoir ag fáil tuarastail go díreach ón Roinn ins an scoilbhliain seo. Ins an bhliain 1930-31 bhí an líon múinteoirí ina thrian, go hathchomair, den fhigiúir sin—1209 múinteoir.
An soláthar de £1,950,000 le haghaidh breistuarastail agus atá á thaispeáint faoi Fhó-mhírcheann B.1, deineadh amach é sul ar tháinig na méaduithe deireannacha ar na scálaí tuarastail i bhfeidhm. Na méaduithe sin, gur tugadh in éifeacht iad ón chéad lá de mhí na Samhna, 1961, tháinig siad den Rialtas do ghlacadh le Tuarascáil an Bhoird Eadrána le haghaidh Meánmhúinteoirí agus meastar gurb é an soláthar breise a bheidh ag teastáil dá réir ins an bhliain airgeadais seo ná £390,000.
Ins an soláthar le haghaidh deontas saotharlainne fé Fhó-mhírcheann A.2 áirítear (a) £84,000 le haghaidh na ngnáthdeontas a íoctar as rangannaí Eolaíochta, Tís agus Adhmadóireachta, (b) £30,000 le haghaidh na scéime nua a cuireadh i bhfeidhm ins an scoil-bhliain reatha chun cabhrú le saotharlanna Eolaíochta a chur ar fáil. Faoi an scéim nua seo, gur dhein mé tagairt dé cur i bhfeidhm an bhliain seo caite, soláthraítear deontais chun cabhrú le gléasanna agus troscán a chur ar fáil le haghaidh saotharlainne oiriúnaí atá á tógáil (1) i dteach scoile nua, (2) i dteach scoile nach bhfuil Eolaíocht á teagasc ann cheana, (3) i dteach scoile ina bhfuil Eolaíocht á teagasc cheana ach ina bhfuil gá le cóiríocht bhreise chuige sin. Faoi an scéim seo, freisin, féadtar deontas a thabhairt i gcás ina mbeartaítear teagasc i mbrainsí breise den Eolaíocht a chur ar fáil.
Cé nach bhfuil sa taobh airgid den cheist ach ceann de na nithe a théann i gcionn ar an méid den Eolaíocht a mhúintear ins na meánscoileanna, sé mo thuairimse gur ní tabhachtach ina leith sin é. Lena chois sin, áit ar bith ina múintear Eolaíocht is inmhianaithe go mór go mbíonn cóiríocht shaotharlainne sách oiriúnach ar fáil inti sa tslí go bhféadann na daltaí an tairbhe is mó is féidir a bhaint as an teagasc. Ar ndóigh, féadtar saotharlanna deaghléasta a bheith ina mealladh do chéimithe san Eolaíochta a bheith ag smaoineamh ar an ngairm mhúinteoireachta mar shlí bheatha tharraingteach.
Pé scéal é, tá mé sásta go gcabhróidh an scéim nua seo go mór le cothú agus neartú an fháis atá le sonrú ar theagasc na hEolaíochta le tamall, ach go háirithe i gcaitheamh an dá bhliain seo chuaigh thart. Ba chóir go gcabhróidh sí, freisin, le caighdeán an teagaisc san Eolaíocht a choinneáil ar leibhéal ard.
Tá dianscrúdú ar siúl ag an Roinn i láthair na huaire ar an cheist ar fad a bhaineann leis na cúrsaí éagsúla Eolaíochta a chur in oiriúint do shaol na linne seo.
An fhaid is atátar ag fanacht ar pé athruithe go measfar iad bheith riachtanach, is féidir an teagasc a choinneáil suas chun dáta trí chúrsaí samhraidh. Ina thaobh sin d'fhéadfaí go ndealródh sé go bhfuil gearradh siar á dhéanamh i mbliana ar an soláthar le haghaidh cúrsaí den chineál sin. Ní mar sin atá an scéal, tá soláthar á dhéanamh i mbliana le haghaidh trí chúrsa do mhúinteoirí. Sé is cúis leis an titim sa soláthar airgid ó £2,350 go £600 i mbliana ná go raibh ar imeachtaí na bliana seo caite cigirí na Roinne agus roinnt mhúinteoirí a chur go dtí na Stáit Aontaithe ar chúrsaí nua-aimsire sa Mhatamaitic faoi choimirce Fiundúireacht Náisiúnta na hEolaíochta ins na Stáit Aontaithe. Ar ndóigh bhain cuid mhaith costais leis na cúrsaí sin, agus ba mhaith liom anseo mo mhórbhuíochas a ghabháil leis an bFiundúireacht as ucht gur sheas siad scar maith de chostas na gcúrsaí, cúrsaí a bhí an-úsáideach ar fad. Go deimhin, ní hé seo an chéad ócáid ar a raibh ábhar buíochais againn don Fhiundúireacht. Tráth ar tionóladh sa tír seo fé choimirce na hEagraíochta Idirnáisiúnta O.E.C.D. seimineár agus cúrsa a lean é ina dhiaidh sin ar theagasc na Ceimice, thug an Fhiundúireacht cabhair mhaith ó shaineolaithe ag an am sin freisin.
Tá fás sonrach tagaithe cheana ar líon na ndaltaí atá ag foghlaim na Fraincíse, mar shampla, ba é an líon dalta a bhí ag gabháil do chúrsaí na Meánteistiméireachta san ábhar sin sa bhliain 1960-61 ná 30,590, i gcomparáid le 27,787 an bhliain roimhe sin.
Sé an sásamh is mó a bhaineann leis an bhfás sin ná go dtaispeánann sé, acht an t-éileamh a bheith ann go bhfuil na scoileanna ullamh agus ábalta chun freastal air.
Is minic a thagann sé i mo cheann go mba chóir dúinn níos mó muiníne a bheith againn as cumas ár gcuid scoileanna. Tar éis an tsaoil thug siad fén Ghaeilge a chur ar aghaidh sna fichidí agus cén fáth mar sin nach dtabharfaidís sna seascaidí fén Fhraincís, an Ghearmáinis nó pé teanga eile a bheadh i gceist a chur ar aghaidh sa tslí chéanna.
Mar sin féin, ins an méid a bhaineann le teagasc teangacha Eorpacha tá cuid mhaith talaimh le déanamh fós ag na scoileanna buachaillí. Céim amháin ar aghaidh chun cabhrú le leathadh teagasc na dteangacha sin is ea an socrú a dhein an Roinn i rith na scoilbhliana seo go n-áireofar seirbhís áirithe teagaisc a thabharfar ar Mhór-Roinn na hEorpa chun críche breiseanna ar an scála breistuarastail.
Tá an cheist fé mhalartú múinteoirí pléite ag roinnt de na scoilchumainn liom agus i láthair na huaire tá an Roinn ag déanamh dianscrúduithe ar a mbaineann leis an gceist sin.
Is áthas liom a chur in iúl don Teach go bhfuil an Bhéaltriail Ghaeilge i scrúdú na hArdteistiméireachta ag dul ar aghaidh go sásúil. Níl amhras ar bith nágur chuir a tabhairt i gcríoch dhá bliain ó soin go mór leis an éileamh ar chleachtadh i labhairt na Gaeilge. Tá sé ró-luath fós le meas go cruinn cén méid feabhais atá tagaithe dá bharr ar líofacht na ndaltaí ach breithneofar an cheist sin go beacht tráth a mbíonn tuarascáil na Comhairle Oideachais ar Chlár na Meánscoile á scrúdú. Ag an bpointe seo ba mhaith liom mo fhíorbhuíochas a ghabháil leis an gCathaoirleach RóOirmhidneach agus le baill na Comhairle as ucht an méid dua agus ama a chaitheadar leis an obair throm a ghaibh le hullmhú a dtuarascála.
Sé an rud a dhéanfar anois i gcás na tuarascála ná í a chur fé bhráid na n-eagríocht éagsúil a bhfuil baint acu le cúrsaí oideachais lena dtuairimí a fháil. Nuair a bheidh na tuairimí sin faite breithneoidh an Roinn an tuarascáil ag féachaint do na tuairimí a gheofar amhlaidh. Sa deireadh is ar an Aire a thitfidh sé teacht ar bhreith i dtaobh na moltaí éagsúil a bheidh i gceist.
CÉARDOIDEACHAS.
Dá mhilliún, aon mhíle, trí chéad is nócha púnt an méid glan atá á iarraidh ins an bhliain airgeadais seo. Is méadú é sin de £337,530 ar an méid a soláthraíodh anuraidh.
Is fé fhó-mhírcheann B ar an liosta atá an tsuim caiteachais is mó, sé sin, an t-airgead i leith deontas bhliantiúl do Choistí Gairmoideachais. Sé an méid atá á soláthar lena n-aghaidh sin i 1962-63 ná £1,801,430. An méadú de thart ar £300,000, sé is cúis leis ar fad beagnach ná an Rialtas do ghlacadh le moladh an Bhoird Eadrána i dtaobh tuarastal múinteoirí. Sé is cúis leis an £6,000 de bhreis faoi fhó-mhírcheann C., Oiliúint Múinteoirí, ná an gá, mar gheall ar ardú costais, atá leis na deontais do na Coláistí Oiliúna Tís a mhéadú.
Dála an mhéanoideachais, tá an gairmoideachas freisin ag dul i méid go seasta. Críochnaíodh tógáil ocht gcinn de scoileanna nua ins an bhliain 1960-61, ceann níos mó ná mar a tógadh ins an bhliain 1959-60, agus mhéadaigh an tinreamh lánaimsire lae go dtí beagán thar 27,000. I gcomhcéim leis sin uilig tháinig méadú de 55 ar an líon múinteoirí lánaimsire agus méadú de 114 ar an líon múinteoirí páirtaimsire sa tslí go raibh ar fostú ins na scoileanna i mí Lúnasa seo caite, 1,661 de mhúinteoirí lan-aimsire agus 1,560 de mhúinteoirí páirtaimsire.
Mar a dúirt mé anuraidh tá an oiread sin gnéithe éagsúla den ghairmoideachas ann gur ar éigin is féidir ar ócáid mar seo cur síos a dhéanamh ar níos mó ná cúpla ceann acu. B'fhéidir gurb é an t-eolas is tábhachtaí is féidir liom a thabhairt díbh i mbliana ná go cuirfear Bille i láthair an Tí go luath chun cur ar chumas Coistí Gairmoideachais a gcuid ioncaim a mhéadú de réir mar is gá. Tá líon áirithe de Choistí ann an bhfuil a n-ioncam cheana ar an méid is mó is féidir dióbh a fháil, de reir dlí, ón Stát agus ó na rátaí. Go deimhin, b'éigean do chuid acu dul i bhfiacha sa Bhanc le freastal ar na glaonna atá orthu. Mar sin, féadtar a rá fén mBille úd "más maith, is mithid".
Tá tagairt déanta agam cheana do fhó-mhírcheann C, agus le linn dom mo shúil a chaitheamh ar an liosta de nithe a bhfuil soláthar déanta dóibh ag an Roinn, b'fhachthas dom narbh olc an liosta sin mar ghléas chun a chur in iúl cad atá á dhéanamh le feabhas a chur ar leibhéal an teagaisc sna gairmscoileanna. Léann an liosta mar leanas:
1. Cúrsa i mBanachas Tí agus Feisteas Tí: Is le haghaidh múinteoirí áirithe Tís an cúrsa sin;
2. Táiliúireacht: Tá an cúrsa sin le haghaidh múinteorí Tís;
3. Áiseanna Éistradharcacha: Arís tá a leithéad seo de chúrsa á chur ar fáil le haghaidh múinteoirí Tís.
4. Matamaitic: Is cuid den scéim an cúrsa sin chun caighdeán teagaisc na Matamaitice a ardú sna gairmscoileanna.
5. Modhanna Múinte san Ealaín: Tá an cúrsa sin le haghaidh timpal 50 múinteoir Ealaíne chomh maith le daoine atá ag gabháil do chúrsa oiliúna múinteoirí Ealaíne.
6. Teastas Timire Gaeilge: Sé cuspóir an chúrsa sin ná caoi a thabhairt do mhúinteoirí, a bhfuil céim ollscoile acu, chun na cáilíochtaí atá ag teastail le haghaidh theagasc na Gaeilge sna gairmscoileanna a bhaint amach.
7. Gaeilge: Athchúrsa é seo le haghaidh múinteoirí atá ar fostú cheana.
8. Dearadh Troscán: Is le haghaidh múinteoirí áirithe adhmadóireachta an cúrsa sin.
9. Áiseanna Éistradharcacha: Cúrsa le haghaidh múinteoirí nach múinteoirí Tís.
10. Bitheolaíocht Mhachaire: Cúrsa le haghaidh múinteoirí Tuatheolaíochta.
11. Tástáil agus Cúram Inneall Diesel: Le haghaidh múinteoirí Miotalóireachta an cúrsa sin.
12. Modhanna Múinte Tuatheolaíochta: Cúrsa gairid é sin i modhanna múinte chun a chur ar chumas céimithe in Eolaíocht Talmhaíochta iad féin a cháiliú mar mhúinteoirí Tuatheolaíochta.
13. Foirgnimh Feirme: Cuirfidh an cúrsa sin le eolas na múinteoirí foirgneolaíochta ar thógáil foirgneamh feirme, rud atá anois ina chuid thábhachtach dá gcuid oibre.
14 and 15. Teicneolaíocht Ceardlainne agus Teoiric an Táite. Tá an dá chúrsa seo á gcur le chéile mar gheall ar an gcosúlacht atá eatarthú agus iad a bheith le haghaidh an ghrúpa chéanna múinteoirí.
16. Dáileadh Miondíola: Le haghaidh múinteorí Tráchtála.
17. Luathscríbhínn agus Clóscribhínn: Tá dhá chuspóir ag an gcúrsa seo, sé sin, é a bheith mar réamhchúrsa le haghaidh scrúdú an Teastais Múinteora agus mar athchúrsa le haghaidh múinteoirí atá oilte cheana.
18. Bainisteoireacht Tí Lóistín: Tá an cúrsa sin á eagrú i gcomhar le Bord Fáilte.
19. Tógáil Bád: Tá an cúrsa sin freisin á eagrú i gcomhair le Bord Fáilte.
20. Teangacha Eorpacha: Tá an cúrsa ceithre sheachtain seo le haghaidh múinteoirí a bhfuil eolas réasúnta acu ar Fhraincis nóar Ghearmáinis acht go mbeadh tréimhse ghairid athnuachana ag teastáil uathu. Eagrófar na rangannaí ins an dá theanga sin sa tslí go mbeidh deis ag an ochtó múinteoir a bhfuiltear ag súil leo staidéar a dhéanamh ag cheann de na teangacha sin nó ar an dá cheann, i gcaitheamh an chúrsa. Cuirfear na cúrsaí sin ar fáil in
ionaid éagsúla, Baile Átha Cliath agus Contae Átha Cliath, Dún Laoghaire, Corcaigh, Pórtláirge, Cathair na Gaillimhe, Béal Átha an Rí, Loch Garman, sa tréimhse Iúil — Meán Fómhair seo chugainn.
Is comhartha na himeachtaí sin ar mheon bheaga ghníomhach, agus mar a dúirt mé i gcás na meánscoileanna, nuair a thagann i gceist an Margadh Coiteann nó aon ní eile a thástálfaidh ár gcumas agus ár réiteach, is féidir linn a bheith réasúnta cinnte nach gclisfidh ár scoileanna orainn, idir scoileanna náisiúnta, meánscoileanna agus gairmscoileanna.
Go dearfa, rachainn chomh fada lena rá, má bhíonn oibrithe oilte ag leibhéal ar bith ag teastáil ó thionscal agus má chuireann an tionscal in iúl go cinnte dearfa cén cinéal oibrithe oilte a bheidh ag teastáil uaidh; go dteaspeáinfidh na coistí gairmoideachais, ar aon nós na coistí a bhfuil scéimeanna móra fúthu, a gcumas chun cuidiú leis na hoibrithe sin a chur ar fáil.
Uaireanta tá sé curtha i leith na gceardscoileanna gur chlis orthu solá thar cuí a dhéanamh le haghaidh teicneoirí a oiliúint ach ar an láimh eile dhe sé an donas go gcloistear uaireanta eile é a rá go bhfuil ár sáithe teicneoirí againn. D'fhonn fírinne an scéil a aimsiú cuireadh coiste ar bun i mo Roinnse le déanaí ar a bhfuil ionadaithe ó na heagraíochtaí go léir a bhfuil baint acu leis an gnó seo. Táthar ag súil le go mbeidh an coiste seo ábalta a fháil amach, go hathchomhair ar a laghad, riachtanas cinnte an tionscail sa mhéid a bhaineann le teicneoirí agus ansin, más gá, go molfaidh sé cén gníomh is ceart a dhéanamh.
Ins an bhliain seo caite, ba é líon iomlán na bprintíseach a scaoileadh go páirtaimsire chun freastal ar chúrsaí sna ceardscoileanna ná 3,495. Is méadú é sin de 508 ar líon na bliana roimhe. Chun freastal ar an éileamh seo ar chúrsaí páirtaimsire, éileamh atá ag dul i méid i gcónaí, beidh gá le tuilleadh áiseanna a chur ar fáil sa réimse thábhachtach seo de cheardoideachas, agus mar gheall air sin is cúis áthais dom é a bheith ar mo chumas tagairt a dhéanamh don bhloc nua a cuireadh leis an gColáiste Teicneolaíochta Sráid Bholtúin agus gur osclaíodh í an lá faoi dheireadh.
Sul a mbeidh deireadh ráite agam faoi na scoileanna náisiúnta, na meánscoileanna agus na gairmscoileanna, ba mhaith liom focal speisialta molta a rá. Tá an moladh sin ag dul d'fhurmhór mór na n-údarás áitiúil as ucht a bhfuil déanta acu chun leas a bhaint, chomh hiomlán sin, as an Acht Scoláireachta, 1961. Dá thoradh sin sé an tslíina mbeidh an scéal ins an scoilbhlain atá romhainn ná go mbeidh an méid airgid la haghaidh scoláireachtaí iar-bhunscoile thar a thí oiread níos mó ná an méid a soláthraíodh anuraidh. Beidh an t-airgead le haghaidh scoláireachtaí Iolscoile thar a bheith dúbalta. Ba thoradh rímhaith é sin ar an chéad iarracht ariamh a dhein an Stát ar bhonn fhoirleitheadúil le cabhair a thabhairt chun scoláireachtaí.
EOLAÍOCHT AGUS EALAÍN.
Dhá chéad, ochtó is seacht míle, aon chéad is seachtó punt an méid glan atá á soláthar sa Vóta seo. Is méadú é sin de £38,490 ar sholáthar na bliana seo caite.
Sé an ceann is mó de na méaduithe go léir ins an Vóta seo ná an méadú a bhaineas le caiteachas ar thuarastail, pá agus liúntais ins na hInstitiúidí Eolaíochta agus Ealaíne. Ceithre mhíle dhéag, ceithre chéad is seacht bpunt déag is iomlán don mhéadú sin. Maidir leis an bhfuíghleach, £24,073, tá £3,950 de faoi Fó-mhírcheann B.3, Scoláireachtaí Ollscoile, agus tá méadú maith freisin, £8,500 ar na deontais le haghaidh Coláistí Samhraidh a chuireann cúrsaí Gaeilge ar fáil; tá méadú de £2,000 ag gabháil don Mhúsaem le haghaidh fearaistí agus ábhar, agus méadú de £1,000 an ceann ag dul don Acadamh Ríoga Ceoil agus do Chumann Míoleolaíochta na hÉireann. Tá méaduithe beaga ar na deontais dóibh seo leanas: Drámaí Gaeilge a chur ar fáil in Amharclainn na Mainistreach, Comhdháil Náisiúnta na Gaeilge, Tréimhseacháin i nGaeilge, an Coimisiún Béaloideasa agus Institiúid Náisiúnta na Scannán.
Fén bhFó-mhírcheann nua, C.9, tá deontas i gcabhair suas go dtí £2,000 á sholáthar le haghaidh Coláiste na n-Oibrithe Caitliceach i dtreo is go mbeidh ar chumas na hinstitiúide fiúntaí sin easnamh airgid bliantúil a sheachaint.
SCOILEANNA CEARTÚCHÁIN AGUS SAOTHAIR
Tá laghdú arís i mbliana ar iomlán an tsoláthair sa Vóta seo. Dhá chéad, triocha is seacht míle, cúig chéad is dachad punt an méid glan atá á iarraidh. Is laghdú de £6,640 ar mhéid na bliana seo caite é sin.
Ins na 48 scoileanna saothair bhí 1,873 chailín agus 1,638 buachaill ag deireadh na bliana 1961, i gcomparáid le 1,965 cailíní agus 1,765 buachaill ag deireadh na bliana 1960. Ins an Scoil Ceartúcháin Buachaillí, bhí 165 buachaill ag deireadh na bliana 1961, i gcomparáid le 183 an bhliain roimhe sin. Ins an dá Scoil Ceartúcháin Cailíní is beag athrú a bhí ar an líon bheag atá fé choimeád iontu.
Cuireadh moill mhór ar an bpleanáil le haghaidh an ionaid nua forchoimeádtha mar gheall ar dheacrachtaí a bhain le suíomh nua a fháil. Is ábhar áthais dom anois é a bheith ar mo chumas a rá go bhfuil suíomh oiriúnach faite ag Fionnglas, agus go bhfuiltear ag súil le tús a chur leis an obair thógála ar an dá luathas. Sé cuspóir an ionaid nua seo ná freastal ar an mbuachaill nach ndeachaidh ach beagán ar strae agus nach bhfuil ach tréimhse ghairid ceartúcháin ag teastáil chun é a chur ar bhóthar a leasa.
INSTITIÚD ÁRD-LÉINN BHAILE ÁTHA CLIATH.
An tsuim atá á lorg £92,510 is méadú é sin de £8,630. Baineann an méadú san ar fad leis na hárdaithe tuarastail ba ghá a thabhairt chun a leibhéal do choimeád ar aon dul leis na hárdaithe tuarastail ins na hiolscoileanna.
IOLSCOILEANNA AGUS COLÁISTÍ.
An méid ghlan atá ag teastáil ná £1,780,830. Suim chaipitil de £602,000 a dheineann furmhór an mhéaduithe de £710,700. Beidh £520,000 den tsuim chaipitil ag teastáil i mbliana le haghaidh tógáil an fhoirgnimh nua Eolaíochta do Choláiste na hIolscoile, Baile Átha Cliath. Séard atá sa bhfoirgneamh so ná an chéad chéim in aistriú an Choláiste, rud ar ghlac Dáil Éireann i bprionsabal leis dhá bhliain ó shoin. Táthar ag súil go gcríochnófar cuid na Fisice agus na Ceimice den fhoirgneamh um Mí Iúil, 1964, agus an chuid eile an bhliain ina dhiaidh sin sa chaoi go bhféadfaí, i Mí Deireadh Fómhair, 1965, freastal ar an míle agus céad mac léinn Eolaíochta agus maolú a dhéanamh ar an siar-bhrú atá ar an gcóiríocht atá ann fé láthair.
Taobh amuigh ar fad den riachtanas agus den fhónamh mhór atá leis an bhfoirgneamh nua Eolaíochta, níor mhiste dom a rá, measaim, go raibh baill an Tí seo nuair d'aontaigh siad leis an soláthar dó ag taispeáint a muiníne as an dtír san am le teacht. Cé nach raibh ceist an Mhargaidh Choitinn beo nuair a cuireadh an beartas seo fé bhráid an Tí i dtosach, is cinnte anois go mbeidh an foirgneamh nua Eolaíochta ina bhuntáiste mhór dúinn i leith an Mhargaidh sin.
Baineann £32,000 den tsuim chaipitil le críochnú Céim a dó den chóiríocht breise a bhí ag teastáil go géar i gColáiste na hIolscoile, Gaillimh. An £50,000 is i leith deisithe riachtanacha i gcás na bhfoirgneamh i gColáiste na Trionóide atá sé.
Níl aon rud beag nó mór i gceist le gan aon soláthar caipitil do bheith déanta do Choláiste na hIolscoile, Corcaigh, ach nach bhfuiltear tagaithe ar shocrú chinnte fós i gcás foirgnimh nua Eolaíochta don Choláiste sin. Ó thaobh soláthair chaipitil dhe níl aon chiall le bheith ag cuimhneamh ar bhliain ar leith. An rud atá le breithniú nuair atáthar ag déanamh comparáide ná cén pointe atá sroiste ins na réamhchomhráití. Ina leith sin níl, mar adúirt mé cheana, baol ar bith ann go ligfidh Corcaigh d'aoinne dearmad a dhéanamh uirthí.
Siad na méadaithe atá ins na deontaisí reatha: Coláiste na hIolscoile, Baile Átha Cliath, £77,000; Coláiste na hIolscoile, Corcaigh, £32,000; Coláiste na hIolscoile, Gaillimh, £25,000 agus Coláiste na Trionóide, £55,000. Thángathas ar na figiúirí sin ar bhun meastachán de na riachtanais ó thaobh foirne breise agus méadaithe tuarastail. Nuair a chuirtear ar an láimh amháin na méadaithe leith ar leith i gcompráid leis an líon mac léinn agus ar an láimh eile nuair a chuimhnítear air nach dtéann na costaisí riartha suas do réir mar a théann an líon mac léinn suas, measaim, agus gach rud a chur san áireamh, go n-aontófar go bhfuil na méaduithe a deineadh ag teacht le breithmheas cóir ar riachtanais na gColáistí ar leith.
AN GAILEIRÍ NÁISIÚNTA.
An méid glan atá ag teastáil ná £15,130 agus an méadú glan de £1,150, tá an méadú san ar fad i leith gnáthbhreisithe tuarastail agus i leith an "ochtú cúrsa" ó thaobh tuarastail agus páighe.