Molaim:
Go dtugann Seanad Éireann an Páipéar Bán um Athbheochan na Gaeilge dá n-aire.
Tá an tairiscint seo ar Pháipéar an tSeanaid le fada ach, bíodh is go raibh orm fanúint, tá mé buíoch den Seanad as uch am a thabhairt dúinn anocht í a phlé. Gabhaim buíochas, freisin, leis an Aire Airgeadais faoi theacht anso, agus é chomh gnóthach agus atá sé chun a bheith páirteach sa dhíospóireacht.
Tuigeann gach éinne ón bhfoclaíocht atá ar an dtairiscint seo nach ag iarraidh aon rud a áiteamh ar an Rialtas ná ar Aire Stáit atá mé ach díreach le caoi a thabhairt don Seanad tuairimí a nochtadh faoi cheist seo Athbheochan na Gaeilge atá ag déanamh imní dúinn go léir le fada an lá. Is ceist í atá beo beathaitheach inár measc le breis is trí scór blian agus is léir ón aighneas agus ón gconspóid ag roinnt leis agus ón méid atá ráite agus scríofa ina thaobh le blianta beaga anuas gur ceist bheo fós é agus nach bhfuil aon laghdú tagtha ar spéis an phobail i gcoitinne ann.
Tá cúis ar leith le go gcuirfí tairiscint mar seo ar chlár an tSeanaid san am a cuireadh, sé sin, i dtosach na bliana seo. Bhí céim nua ar fad tar éis a thabhairt in iarracht na hAthbheochana trí eisiúint an Pháipéir Bháin. Chuir an Páipéar Bán crot nua ar fad ar iarracht na hAthbheochana nach raibh riamh air cheana. Bhí glactha ag an Rialtas mar chúram air féin cuid mhór de mholtaí an Choimisiúin a chur i bhfeidhm. Bhí siad tar éis cuspóir na hAthbheochana a ghlacadh chucu mar pholasaí náisiúnta, ar aon chéim, d'fhéadfaí a rá, lena bpolasaí faoi fhorbairt talmhaíochta nó tionsclaíochta. I bhfianaise na dtoscaí nua seo b'fhiú liom an tairiscint seo a thabhairt ós bhur gcomhair le go bhféadfadh Seanadóirí breith a thabhairt ar bheartas nua seo an Rialtais agus le treoir agus comhairle a thabhairt dóibh i bhfeidhmiú an bheartais sin. Is é is trua liom nach raibh an deis seo againn sé mhí ó shin nuair a bhí an scéal úr-nua ach sin rud nach raibh neart agamsa air.
Más linn léargas ceart d'fháil ar thábhacht an Pháipéir Bháin, ní mór dúinn dul siar píosa ar nua-stair na Gaeilge agus a mheabhrú dúinn féin an spleodar agus an díograis chun na teanga a cothaíodh i measc muintir na hÉireann i mblianta tosaigh an chéid seo trí imeachtaí Chonradh na Gaeilge. Níor mhiste dúinn a mheabhrú gur as an spleodar agus an díograis sin, don chuid is mó, a d'fhás an réabhlóid pholaiticiúil agus íobairt 1916; gur mhair an spleodar céanna i gcroíthe na ndaoine le linn cogadh na saoirse, rud is furasta a léiriú ón spiorad fíor-Ghaelach inar ionsaigh an Chéad Dáil a gcuid gnótha. Is mairg go deo nach é an spiorad céanna atá i nDáil an lae inniu, ach b'fhéidir nach bhfuil an lá caillte fós.
Le teacht na saoirse, pé saoirse a tháinig, laghdaig ar an iarracht deonach. Níor ghá aon iarracht feasta, dar le daoine. Bhí an síol curtha agus thiocfadh an barr i mbláth leis an aimsir dá acmhainn féin. Ach ba é an cogadh cathartha a bhuail an buille marfach ar fad. Ní hamháin gur mhúscail sé easaontas i measc Gaeilgeoirí fhéin ach bhain sé súile agus croí agus intinn an phobail Ghaelaigh den leath ba thábhachtaí den aidhm náisiúnta mar cé déarfadh gurbh fhearr Éire saor gan a bheith Gaelach ná í Gaelach gan a bheith saor! Ba mhó ag daoine san am Treaty versus Anti-Treaty ná Gaelachas versus Galldachas.
Ar ndóigh níor ligeadh ceist na Gaeilge i ndearmad amach is amach. Ar an leibhéal oifigiúil rinneadh na forálacha cuí do réir an Bhunreachta chun a chinntiú go mbeadh an teanga á múineadh go forleathan sna scoileanna agus go mbeadh cumas éigin Gaeilge ag státseirbhísigh. Ach tá faitíos orm nach raibh croí an phobail san iarracht agus ní dearnadh aon mhór-iarracht ar chroí an phobail a bhogadh chun na Gaeilge. Bhí obair na scoileanna á diomailt trí patuaire agus nea-shuim an phobail. Ba léir go raibh taoide na Gaeilge ag trá ainneoin dícheall na n-eagraíochtaí deonacha agus na ndaoine nár chaill an creideamh ariamh. Sin mar a bhí an scéal nuair a bunaíodh an Coimisiún um Athbheochan na Gaeilge sa bhliain 1958 chun taighde a dhéanamh ar staid na Gaeilge agus moltaí a chur faoi bhráid an Rialtais faoin gcaoi ab éifeachtaí chun cuspóir na hAthbheochana a thabhairt i gcríoch.
Is fiú dúinn ag an bpointe seo féachaint ar na téarmaí tagartha a
Ag féachaint don chéim atá sroichte faoi láthair leis an iarracht chun an Ghaeilge a athbheochan, breithniú a dhéanamh agus comhairle a thabhairt faoi na bearta ba cheart don phobal agus don Stát a dhéanamh anois d'fhonn go rachfar ar aghaidh níos tapúla chun na cuspóra sin.
Tugtar faoi deara nach é a cuireadh ar a gcúram féachaint arbh fhiú nó arbh fhéidir cuspóir na hathbheochana a bhaint amach ach comhairle a thabhairt faoi na bearta ba cheart don phobal agus don Stát a dhéanamh anois chun an chuspóir a chur i gcríoch chomh tapaidh agus ab fhéidir. Mar sin in aon phlé a bhéas againn ar an bPáipéar Bán, ina bhfuil breithiúnas an Rialtais ar mholtaí an Choimisiúin, níor cheart go mbeadh cead aon cheist a thógáil faoi cheart nó faoi éigeart prionsabal agus polasaí na hathbheochana. Ní le ceart nó éigeart na hathbheochana a bhaineann Tuarascáil an Choimisiúin ná an Páipéar Bán ach le na bealaí agus na bearta trína ndéanfar an polasaí sin a chur i gcríoch go héifeachtúil.
Tá na cúiseanna lér cheart dúinn cloí leis an nGaeilge agus bualadh ar aghaidh le hobair na hathbheochana mínithe go háiritheach agus go héifeachtach ní hamháin i dTuarascáil an Choimisiúin ach freisin sa Pháipéar Bán féin. Ní gá domsa mar sin aon athaithris a dhéanamh orthu fiú amháin dá mbeadh sé in ordú sin a dhéanamh, rud a bhfuil mé in aimhreas air. Breithnímis an Páipéar Bán mar cháipéis ina bhfuil tairiscintí an Rialtais leagtha amach chun polasaí, a bhfuil glactha leis ar leibhéal náisiúnta, polasaí an Rialtais a chomhlíonadh. Scrúdaímis agus iniúchaimís é féachaint an leor é nó an lochtach é don chuspóir atá leis. Tá gné amháin de ar a laghad nach féidir locht d'fháil air sa mhéid go soláthraíonn sé dúinn sain-mhíniú sásúil ar pholasaí an Stáit i leith na teanga agus cruthaíonn sé go bhfuil glactha ag an Rialtas air féin an polasaí sin a chur i gcríoch. Tá talamh slán déanta de go bhfuil an Rialtas á cheangal féin le polasaí dearfa i leith na Gaeilge agus is mór an chéim ar aghaidh an méid sin féin. tugadh don Choimisiún, mar atá:
Tá tairiscintí an Rialtais leagtha amach faoi chinn-teidil éagsúla. Baineann an chéad cheann le Córas Riaracháin Phoillí agus tá an roinn sin sásúil go maith ar pháipéar. Braitheann éifeacht na dtairiscintí sa roinn seo, agus i ngach roinn eile chomh maith, ar cé chomh dáiríre is atá na húdaráis faoi. I gcás na státseirbhíse de, mura bhfuil an tAire féin agus a phríomh-oifigigh lán dáiríre faoi chur chun cinn na Gaeilge, ní féidir bheith ag súil le toradh fónta ó na fo-oifigigh. Cén mhaith é ceann na státseirbhíse, an tAire Airgeadais atá anseo againn anocht, treoir nó ordú a chur chuig Roinn Stáit eile faoi seo nó siúd a dhéanamh ar mhaithe le cur chun cinn na Gaeilge sa Roinn sin agus b'fhéidir Aire na Roinne sin gan a bheith báúil le Gaeilge in aon chor. Tá a leithéid d'Airí ann, creidim. Is é tá mé ag iarraidh a chur in iúl go bhféadfadh an Rialtas a rá go raibh gach aon rud dá raibh geallta acu sa Pháipéar Bán seo á ndéanamh acu agus gan toradh dá laghad a bheith air, mura gcuirtear córas cinnte ar bun chun, a chinntiú go mbeidh leanúnachas ag baint leis an iarracht, go mbeidh duine nó daoine i ngach Roinn a mbeidh sé mar shain-dualgas orthu féachaint chuige go gcuirfear gach treoir agus gach ordú i bhfeidhm agus go gcoinneofar i bhfeidhm é. Sin é an laige is mó a fheicimse sa Pháipéar Bán. Cé gur fianaise láidir é ar dheá-thoil an Rialtais, fágann sé bealach sleamhnaithe acu as an gcuid is mó de na geallúintí atá tugtha acu. Tá an leabhar breac le habairtí mar: "Spreagfar" daoine chun é seo a dhéanamh; "Molfar é seo" do dhaoine áirithe; "Déanfar é seo más féidir"; "Cuirfear an moladh seo i gcomhairle do" dhaoine áirithe. Tá an easpa chinnteachta seo intuigthe i gcásanna áirithe ach sa mhéid a bhaineann le Radio agus Telefís agus le comhlachtaí Stáit eile bheifí ag súil le gealltanas cinnte údarásach nach mbeadh aon dul siar air. Mura dtugtar go dúthrachtach faoin gcóras riaracháin phoiblí a Ghaelú, beidh sé fánach bheith ag súil le toradh fónta ó eagrais nó ó chomhlachtaí atá a bheag nó a mhór neamhspleách den Rialtais.
Tá de locht agam ar an roinn a bhaineas leis an gcóras oideachais go dtugann sé le fios nach gá aon mhórathrú a dhéanamh. Shílfeá air go bhfuil an Rialtas sásta le staid na Gaeilge sna scoileanna. Má tá, tá a lán eile nach bhfuil sásta ná leathshásta. D'fhéadfainn a lán laigí a lua. Cuir i gcás an córas atá ann chun múinteoirí a oiliúint. Tá sé sin anlochtach ó thaobh na Gaeilge de. Níl aon leor-iarracht á dhéanamh chun soiscéal na Gaeilge a chur abhaile ar na hábhair mhúinteoirí agus tá fhios ag an saol gur cuma cé chomh oilte is atá duine in ealaíon na múinteoireachta, mura bhfuil an creideamh go daingean ina chroí, nach dtabharfadh sé dá dhaltaí ach oumas scrúdú a phasáil. Ní leor le duine ar bith againn é sin.
I gcás na meán-scolaíochta, tá geallta dúinn go gcuirfear béal-triail ar bun don Mheán-Teistiméaracht i gceann cúpla bliain agus go gcoinneofar béim ar labhairt na teanga as seo amach. Céim mhór ar aghaidh é sin agus cuirimid fáilte roimhe. Tá geallta dúinn freisin go gcuirfear neart téacsleabhar ar fáil i nGaeilge do na meánscoileanna agus go n-ullmhófar leabhair nó tráchtais oiriúnacha ar thábhacht agus ar stair na Gaeilge mar chuid den chlár léinn don mheán-scoil. Is breá liom go bhfuil glactha ag an Rialtas le na moltaí sin ach ní léir dom go bhfuil aon fheabhas fós ar scéal na dtéacs-leabhar agus ní heol dom go bhfuil aon cheo déanta fós chun na leabhair eile a sholtáthar ach an oiread. B'fhéidir go scaoilfidh an tAire lena theanga ar ball agus an t-eolas sin a thabhairt dúinn.
Tá roinn eile den Pháipéar Bán ag plé le slánú na Gaeltachta agus aguisín leis an leabhar ag cur síos ar a bhfuil déanta cheana ag an Rialtas ar son na Gaeltachta. Caithfidh sé gur soiléir don Rialtas nach leor a bhfuil déanta cheana agus go gcaithfear tabhairt faoi slánú na Gaeltachta ar bealaí eile seachas mar bhí á bhfeidhmiú cheana. Tá tús maith déanta sa mhéid go bhfuiltear tar éis Gaeltarra Éireann a chumasú chun tionscail nua a bhunú agus chun dul i bpáirt le comhlachtaí eile taobh amuigh den Ghaeltacht chun na críche céanna. Níl ach ceithre mhí ann ó chuireamar go léir anseo fáilte roimh an mBille sin. Tá súil agam go rachfar ar aghaidh láithreach chun an cumas nua sin a úsáid mura bhfuil sin déanta cheana. Is mór a rachadh sé chun sásaimh do mhuintir na Gaeltachta agus ba mhór an tógáil croí dóibh dá gcuirtí tionscal nó dhó ar bun láithreach. Ba chruthú praicticiúil dóibh é go raibh cúram á dhéanamh dá gcás agus go raibh iarracht dearfa á dhéanamh chun obair a sholáthar dóibh ina dtír agus ina ndúiche féin. Mar adúirt mé anseo cheana, is mó de thubaiste liom aon chainteoir dúchais amháin a dhul ar imirce as an tír ná deichniúr as an nGalltacht.
Níor cheart dom gan an Rialtas a mholadh freisin as an gComhlacht Comhairlaitheach a roghnaigh siad go gairid tar éis don Pháipéar Bán a theacht amach. Is dream iad a bhfuil lán-iontaobh agam astu go gcuirfidh siad comhairle cheart chúntach ar an Aire Airgeadais. Ach ní thuigim cén fáth ar cuireadh gobán orthu agus nár chuala éinne ó shin céard tá ar siúl acu. Tá a lán daoine ann ar suim leo fhios a bheith acu céard iad na gnéithe den athbheochan a bhíonn á n-ionsaí acu ó am go céile. B'fhéidir nár mhiste don Aire tuarascáil uatha a chur ar fáil go tráth-rialta mura mbeadh ann ach lena ngníomhaíocht a chionneáil os comhair an phobail, mar táspéis ag an bpobal ins na h-imeachtaí a bhíonn ar siúl acu.
Ní fhéadfainn, agus a laghad am atá ar fáil againn, gach aon chuid den Pháipéar Bán seo a phlé. Fágfaidh mé faoi Sheanadóirí eile plé níos mine a dhéanamh ar ghnéithe eile de. Beidh suim ag Seanadóirí éagsúla i ngné amháin de thar gné eile. Ach níl aon leisc orm a rá go bhfáiltím ó chroí roimhe mar gur plean é, rud nach raibh againn cheana. Creidim freisin gur iarracht macánta é ag an Rialtas chun comhlíonadh polasaí na hathbheochana a chur ar bhonn rialta. Ach feicim contúirt mhór amháin ann, rud a chuirtear i gcuimhne dom leis an athrú meoin a thárla sa bhliain 1922, go mbeidh daoine ag rá leo féin nach baol don Ghaeilge anois ó tharla an Rialtas a bheith ag déanamh lánchúraim di feasta agus nach gá aon iarracht ón ngnáth-phobal chun í a chur ar láimh sábhála. Ar ndóigh a mhalairt ar fad atá fíor. Níl aon uair is mó a raibh iarracht ag teastáil ón ngnáthdhuine ná an t-am i láthair. Daoine a ghríosú agus a mhisniú chun na hiarrachta sin is mó atá a dhíth anois. Agus is sa chuid sin den obair is fearr is féidir le Seanadóirí agus le daoine meastúla eile sa phobal cabhrú leis an iarracht trí dheá-thoil a léiriú agus deá-shompla a thaispeáint.
I should not like to think that any Senator would feel inhibited or in any way precluded from expressing himself freely on this motion because of inability to do so in the Irish language. I would naturally prefer to see the position in which everyone could feel equally at home in both languages, which is the position to which we aspire. But in the discussion which is to follow, I hope that Senators will bear in mind that the White Paper deals with the means whereby the Irish language is to be restored and not with the desirability or feasibility of attempting the work of restoration. The terms of reference of the Commission on whose report the White Paper is based precluded consideration of everything except the means by which the restoration might be expedited. We must take it at this stage that the policy of restoration is an accepted one and that our function under this motion is to discuss the wisdom or otherwise of the proposals set out in the White Paper in the context of the objectives they are designed to achieve. I have much pleasure in placing the motion before the House.