Tairgim:—
Chun críche aon Achta a rithfear sa tsiosón seo do dhéanamh socruithe bhreise agus feabhsaithe chun na tionscail tuaithe atá anois á riaradh ag Roinn na Gaeltachta d'eagrú, a stiúradh agus d'fhorbairt, do dhéanamh socruithe chun tionscail nua agus scéimeanna somhaoineacha fostaíochta a thionscnamh sa Ghaeltacht, do bhunú Boird dá ngairmfear Gaeltarra Eireann, do mhíniú a chumhacht agus a dhualgas, d'aistriú na dtionscal tuaithe sin chun an Bhoird sin agus do dhéanamh socruithe i dtaobh nithe áirithe eile a bhaineas leis na nithe réamhráite, go bhfuil sé oiriúnach a údarú:—
(1) go n-íocfar leis an mBord i ngach bliain airgeadais, as airgead a shólathrós an tOireachtas, deontas de pé méid a cheadós Aire na Gaeltachta, le comhthoiliú an Aire Airgeadais, i leith caiteachais an Bhoird;
(2) go n-airleacfar as an bPríomh-Chiste nó a thoradh fáis pé suimeanna (nach mó san iomlán ná cúig chéad míle punt) a iarrfas an Bord ó am go ham chun a chumasú dhó a fheidhmeanna d'fheidhmiú nó a chomhlíonadh;
(3) go ndéanfar príomhshuim agus ús na n-urrús go léir a heiseofar faoin Acht sin a mhuirearú ar an bPríomh-Chiste nó a thoradh fáis agus d'íoc as an gcéanna; agus
(4) go n-íocfar as airgead a sholáthrós an tOireachtas an caiteachas faoina raghfar ag riaradh an Achta sin.