An chéad rud ba mhaith liom a rá ná nach bhfuil dabht ar bith ann ach go bhfuil dul chun cinn an-mhaith déanta ó thaobh obair a chur ar fáil do mhuintir na Gaeltachta. Tá athrú an-mhór ar fad déanta le trí nó ceathair de bhlianta anuas agus tá sé sin le feiceáil i ngach aon chearn sa Ghaeltacht. Is é sin an rud a thug dóchas agus atá ag tabhairt dóchais do mhuintir na Gaeltachta. Tuigeann siad go bhfuil suim an-mhór ag an Rialtas sa Ghaeltacht agus sa Ghaeilge agus tá sé sin le feiceáil sna monarchana nua atá curtha ar bun agus sa mhéid airgid atá á chaitheamh sa Ghaeltacht. Fiú sa Mheastachán seo tá tuilleadh airgid á chur ar fáil do Ghaeltarra Éireann le tionscail a chur ag obair sa Ghaeltacht agus le cuidiú le muintir na Gaeltachta a choinneáil sa bhaile.
Labhair an Teachta Ó Domhnaill faoi na monarchana nua a cuireadh ar bun i nGaoth Dobhair agus dúirt sé gur cailíní is mó a bheidh ag obair ansin agus gur mhaith leis go dtabharfadh Gaeltarra Éireann aghaidh ar obair a chur ar fáil do na fir. Ba mhaith liom é seo a rá i dtreo nach dtiocfaidh míthuiscint ar bith as sin: níl an méid a dúirt an Teachta ceart chor ar bith. Nuair a bheidh na monarchana seo faoi lánseol i nGaoth Dobhair beidh ceathrar fear ag obair do gach aon bhean a bheidh ionta. Ba mhaith liom anois go bhfaigheadh an méid sin poiblíocht mar tá sé antábhachtach go dtuigfidh muintir Ghaoth Dobhair gur fir is mó a bheidh ar obair sna monarchana nua seo atá curtha ar bun againn ann.
Luaigh an Teachta fosta ceist Chill Charthaigh agus an Cheist Dála a chuir sé síos dom an tseachtain seo caite. Is é an rud a tharla ansin gur tugadh seachtain bhreise laetheanta saoire—trí sheachtain ar fad—do na hoibrithe sa mhonarcha sin don chéad uair riamh i mbliana agus cionn is gur fearr leis na daoine a bhíonn ar obair sa mhonarcha sin laetheanta saoire a fháil ag an am den bhliain is táirgeacht agus, ar an ábhar sin, is airgead dóibh, chuaigh lucht bainistíochta Ghaeltarra Éireann sa mhonarcha sin i gcomhairle leis na hoibrithe agus dúirt siad leo go dtiocfadh leo dhá sheachtain saoire a ghlacadh dá mba mhian leo ag an am sin. Ach, do réir dealraimh, ní raibh na hoibrithe sásta leis sin agus fágadh an scéal mar sin ina dhiaidh sin. Dúradh fosta, nuair a bhí a fhios ag an lucht bainistíochta thuas ansin go raibh an Teachta le Ceist a chur síos sa Dáil mar gheall air sin, gur cuireadh na daoine ag obair ní amháin sa ló ach san oíche fosta. Níl sé sin i gceart ach an oiread, mar i gcuid den mhonarcha sin bhí obair ar siúl i rith an lae agus i rith na hoíche le tamall. Ach obair de shaghas eile a bhí i gceist anseo. Tá socrú déanta anois, sílim, a bhfuil gach aon duine sásta leis.
Luadh an marc trádála, bréidín Dhún na nGall agus mar sin de. Tá deacracht ag baint leis seo: chuamar isteach ann cheana féin nuair a chuir Teachta éigin Ceist síos á rá gur cheannaigh sé éadach i Sasana a rinneadh san Iodáil, sílim, agus "Bréidín Donegal" scríofa air. Fuaireamar amach gur rí-dheacair marc trádála a chlárú a bhfuil ainm áite ar leith ann, go háirithe, cuirim i gcás, nuair a chiallaíonn focal mar "Donegal" saghas áirithe bréidín ar fúd an domhain—fiú amháin i gcás daoine nach bhfuil eolas ar bith acu faoi Dhún na nGall anseo in Éirinn.
Chuir an Teachta Ó Domhnaill agus an Teachta Ó Cúgáin ceist cé hiad na daoine a gheobhaidh obair sna monarchana nua seo. Bhuel, níl dabht ar bith ann ach gurb iad muintir na Gaeltachta atá agus a bheidh ag obair iontu. Bíonn orainn bainisteoirí a fháil taobh amuigh den Ghaeltacht uaireanta—daoine a mbíonn an scil acu nó daoine a mbíonn céird na bainistíochta foghlamtha acu—ach go geinearálta na daoine a fhaigheann obair sna monarchana sin is daoine de mhuintir na Gaeltachta agus ní daoine ón taobh amuigh iad. Ach mar is gnách leis an Teachta Ó Cúgáin, is maith leis rud a tharraingt anuas a gheobhaidh na ceannlínte, mar a déarfá, agus is é an rud is mó a bhíonn ar siúl aige anois ná trácht ar na daoine leis na cótaí mohair. Níl a fhios agam cé hiad sin ach, de réir dealraimh, tá aithne ag an Teachta Ó Cúgáin orthu. Is é an port amháin a bhíodh ag an Teachta Ó Cúgáin anseo i gcónaí ná caint ar na daoine ag dul síos chuig na báid agus muintir na Gaeltachta ag imeacht amach as an tír ar fad. Ach tá deireadh ag teacht leis sin mar tá fhios aige, faoi láthair, cionn is go bhfuil dul chun cinn chomh maith sin déanta againn sa Ghaeltacht go bhfuil daoine as an Gaeltacht i nGlascú, i mBirmingham agus in áiteanna eile ag scríobh abhaile chuig a muintir ag cur ceisteanna orthu i dtaobh na monarchana nua seo agus á fhiafraí díobh an mbeadh seans acu poist a fháil iontu ionas go dtiocfadh siad abhaile. Sin é an bealach a bhfuil na daoine sin ag teacht anois agus, nuair atá an cluiche a bhí aige caillte ag an Teachta Ó Cúgáin, caithfidh sé teacht ar cheannlínte nua.
Mar a dúirt mé ag an tús, tá an dul chun cinn sin á dhéanamh ag Gaeltarra Éireann. Tá siad ag cur obair ar fáil do dhaoine sa Ghaeltacht agus táimse bródúil as an méid oibre atá déanta acu le blianta beaga anuas. Tá a fhios agam go leanfar ar aghaidh leis an obair seo níos gaiste fiú amháin ná mar a táimid ag dul le tamall.
Maidir le hArdoifig Ghaeltarra sna Forbacha, tá an dúshraith istigh agus na ballaí á dtógáil agus ní eol dom cúis ar bith nach mbeadh an foirgneamh réidh don fhoireann i mbliana. Arís, ba mhaith liom Gaeltarra Éireann a mholadh as ucht na fostaíochta a chuireann siad ar fáil do mhuintir na Gaeltachta agus, mar a dúirt mé, is é an aidhm atá againn ná go mbeidh muintir na Gaeltachta ábalta obair a fháil ina gceantair féin agus nach mbeidh orthu dul thar lear leis an obair sin a fháil. Sin é an chuma atá ag teacht ar an scéal anois.