Vol. 396 No. 4
1 D'fhiafraigh Mr. McGinley den Taoiseach an dtuigeann sé an droch-chaoi atá ar an áras ina bhfuil Comhdháil Náisiúnta na Gaeilge lonnaithe; na deacrachtaí atá ag an fhoireann gníomhú go héifeachtach as an áit sin; agus an bhfuil aon phlean aige foirgneamh níos oiriúnaí a chur ar fáil don Chomhdháil.
Faoi mar is eol don Teachta, íocann mo Roinnse cúnamh bliantúil le Comhdháil Náisiúnta na Gaeilge agus is ceist í don chomhdháil féin a gnóthaí a reachtáil — ar a n-áirítear cóiríocht shásúil a chur ar fáil dóibh féin — leis an gcúnamh sin. Ba chóir go dtuigfí gurb í an chomhdháil féin a shocraigh ar an áit ina bhfuil siad lonnaithe faoi láthair a ghlacadh ar cíos.
Tuigim go maith go bhfuil droch-chaoi ar an bhfoirgneamh sin mar thug mé cuairt air tamall ó shin. Is ceist í don chomhdháil áit níos oiriúnaí a aimsiú agus na socruithe cuí a dhéanamh ina leith. Más amhlaidh go mbeadh méadú réalaíoch uathu sa deontas bliantúil chun íoc as cíos méadaithe, bheinn sásta iarratas dá leithéid a mheas chomh báúil agus is féidir laistigh de na teorainneacha airgeadais atá ar mo Roinnse.
Ní miste a lua freisin nach bhfuil ach moladh deimhnitheach amháin faighte agam ón gcomhdháil go nuige seo maidir le malairt cóiríochta, sé sin, go gceannódh an Stát foirgneamh dóibh ar chostas £850,000. Aontóidh an Teachta liom nach moladh réalaíoch é seo agus cúrsaí airgeadais an Stáit mar atá.
Ba mhaith liom buíochas a thabhairt don Aire as an fhreagra a thug sé, agus, mar is eol dó, agus, mar a admhaíonn sé féin, tá obair antábhachtach ar siúl ag Comhdháil Náisiúnta na Gaeilge. Tharla sé cúpla seachtain ó shin go raibh deis agam a dhul isteach sa Chomhdháil agus, chuir sé alltacht orm nuair a chonaic mé na coinníollacha a bhfuil siad ag iarraidh a bheith ag obair futhu ansin. D'fhéadfá a rá nach bhfuil aon díon ar an fhoirgneamh. An lá a bhí mé ansin bhí sé fliuch agus bhí an t-uisce ag teacht isteach i seomra a bhíonn ag plé le gné thábhachtach de chúis na Gaeilge.
Tá an cheist anfhada ar fad, a Theachta.
Tá iarratas istigh ag an Chomhdháil ar dhul go dtí foirgneamh úr. An bhféadfadh an tAire a rá an bhfuil an Rialtas sásta an cead sin a thabhairt agus an tacaíocht a thabhairt dóibh a dhul isteach i bhfoirgneamh úr mar tá an foirgneamh in a bhfuil siad i láthair na huaire contúirteach.
Mar a dúirt mé, is é an t-aon mholadh atá agamsa ón chomhdháil ná cead a thabhairt nó airgead a chur ar fáil chun foirgneamh nó cóiríocht nua a cheannach. Is é an costas a bhí air sin ná £850,000, agus níl an cineál sin airgid againne. Má tá suim acu i bhfoirgneamh eile agus é a fháil ar cíos, beidh mé sásta breathnú ar an gceist, ach, ní féidir linn suas le milliún punt a chur ar fáil.
An cheist dheireanach agus ceist ghairid, a Theachta.
An aontaíonn an tAire go bhfuil deacrachtaí uafásacha ag foireann na comhdhála faoi láthair oibriú go héifeachtach san fhoirgneamh in a bhfuil siad agus go bhfuil géarghá le foirgneamh úr chomh luath agus is féidir?
Thug mé cuairt ar an fhoirgneamh roimh na Nollaig agus, ceart go leor, tá droch-chaoi air. Ach, is ceist í seo don chomhdháil foirgneamh eile a fháil ar cíos agus a chur in iúl dom an cineál costais a bheidh ar an bhfoirgneamh sin, agus beidh mé breáshásta an cheist a chíoradh ansin.
