Vol. 410 No. 3
1 D'fhiafraigh Mr. McGinley den Taoiseach an bhfuil moladh faighte ina Roinn ó Údarás na Gaeltachta maidir le tionscnamh do thionscal i nDún na nGall (sonraí tugtha); cén uair a fuarthas an cás ina Roinn; agus cathain a dhéanfar cinneadh ina thaobh.
Is cúis áthais dom a chur in iúl don Teachta go bhfuil mé tar éis toiliú le togra ó Údarás na Gaeltachta chun cúnamh breise a chur ar fáil don chuideachta i gceist.
Tá mé buíoch den Aire as freagra a thabhairt ar mo cheist sa Dáil inniu agus ba mhaith liom a chur in iúl dó gur thug sé an freagra ar Raidió na Gaeltachta Dé Luain.
Tar éis an toghcháin.
Tar éis an toghcháin. Nuair a chuireann Teachta ceist síos, rud a rinne mé an Déardaoin seo caite, agus an freagra a bheith ar Raidió na Gaeltachta Dé Luain — an bhfuil sé sin ag teacht le traidisiún na Dála agus an Tí? Ba mhaith liom a iarraidh ortsa, a Cheann Comhairle, mar oifigeach de chuid an Tí seo a bhfuil an-stádas agat sa Teach, an bhfuil sé inghlactha freagraí a thabhairt sula dtugtar sa Teach iad?
Caithfidh sé go bhfuil díomá ar an Teachta gur ghlac mé leis seo. Ar ndóigh, ní chuireann sé iontas ar bith orm tar éis páipéir an lae inniu a léamh. Níl a fhios agam cén dearcadh atá ag mo chomhleacaí maidir le deontais. Tá sé ag gearán go bhfuil deontais á gcur ar fáil agus ag rá nach ceart airgead an lucht PAYE and PRSI a chur ar fáil, agus tá sé ag gearán inniu go bhfuil mé ag cur deontas ar fáil don Ghaeltacht. Chomh fada agus atá mise i gceannas sa Roinn seo beidh mé ag tabhairt cibé cuidiú is féidir do phobal na Gaeltachta agus do phobal na Gaeilge. Cuireann sé iontas orm agus níl a fhios agam cén dearcadh atá taobh thiar de.
Níl mé chun cúrsaí polaitíochta an dáilcheantair a throid anseo. B'fhéidir go bhfuil sé ag cur isteach ar an Aire nár éirigh leis ach suíochán amháin a fháil as sé cinn i gceantair Ghaeltachta i nDún na nGall. Chuir mé an cheist, cad é an dáta a fuarthas an cás i Roinn na Gaeltachta. Níor inis an tAire é sin dúinn agus tá sé sa cheist. Cad é an dáta a fuarthas an moladh ón Údarás?
Pé tuairim atá ag an Teachta ina pháirtí féin, ba cheart dó é a throid laistigh dá pháirtí. Chuir mise in iúl i dtús na seachtaine, agus táim ag cur in iúl arís inniu, go bhfuil sé seo glanta agus níl a fhios agam an bhfuil an Teachta sásta leis an fhreagra. Níl eolas ar bith eile ar bhfhéidir liom a thabhairt agus níl mé chun sonraí ná mioneolas maidir le cinneadh an Rialtais a thabhairt.
Más rud é go raibh mo cheist mar chúis le é seo a cheadú, tá lúcháir orm, ach ba mhaith liom a chur in iúl don Aire gur thóg sé beagnach bliain é a dhéanamh, go raibh an comhlacht seo fágtha gan aon chuidiú nó aon fhreagra ar an tairiscint a chuir siad isteach, agus má éirigh le Ceist Pharlaiminte é sin a dhéanamh, tá lúcháir orm.
Níor thóg sé bliain, agus caithfidh mé é seo a rá leis an Teachta. B'fhéidir nach bhfuil a fhios aige an dóigh a n-oibríonn an córas. Nuair a ghlanann Údarás na Gaeltachta iarratas, caitear é a chur chugamsa. Ina dhiaidh sin, nuair atá deontas os cionn mhilliún punt, is éigean é a chur chuig an Rialtas. Chomh maith leis sin caithfimid moltaí a fháil ó na Ranna Stáit cuí eile. Níl mise, ná Aire ar bith eile, ag dul a ghlanadh deontas ar son deontas a ghlanadh. Fiú más Dún na nGall nó áit ar bith eile atá i gceist, caithfear an dualgas sin atá orainn a chomhlíonadh.
