Faoi mar atá ráite sa Pháipéar Bán um Athbheochan na Gaeilge, tá an Rialtas tar éis a chinneadh go gcaithfidh Gaeltarra Éireann bheith ina phríomhghléas chun gníomhaíochtaí eacnamaíocha de chineál tionsclaíoch a fhorbairt i ngach limistéar Gaeltachta. Tagann de sin nach foláir an tAcht faoinar bunaíodh Gaeltarra mar bhord reachtúil sa bhliain 1958 a leasú agus a leathnú. Is chuige sin atá an Bille seo os comhair an tSeanaid.
Tá a lán cumhachtaí ag Gaeltarra Éireann cheana féin agus is féidir leis tionscail nua a bhunú ag gníomhú dó in a aonar nó as a stuaim féin. Mar is eol don Seanad, áfach, ní leor monarcha a thógáil agus dul i mbun oibre: ní mór earraí fiúntacha a dhéanamh agus iad a dhíol go héifeachtach. Tionsclaithe a bhfuil eolas teicniúil agus teacht ar mhargaí acu atá ag teastáil go géar uainn. Nuair a rithfear an Bille seo beidh Gaeltarra Éireann, le toiliú an Aire, in ann dul i gcomhar le tionsclaithe den saghas sin agus páirt ghníomhach a ghlacadh i reachtáil na dtionscal ar mhaithe leis an nGaeltacht. I gcás comhlachta ina mbeidh scaireanna ag Gaeltarra agus tionsclaí mar sin i bpáirtíocht lena chéile, beidh cumhacht ag Gaeltarra—faoi alt 3 den Bhille — deontas a thabhairt chun tionscal oiriúnach a fhorbairt. Ní bheidh ar chomhlacht mar sin bheith ag plé le haon eagras eile chun deontas a fháil ach, ar ndóigh, más fearr le tionsclaí gan dul i gcomhar le Gaeltarra Éireann chun tionscal a bhunú sa Ghaeltacht, is féidir leis féin deontas a lorg ón bhForas Tionscal mar a dhéantar faoi láthair.
Chun tionscail bheaga—ar a dtugtar "miontionscadail shomhaoineachta" in alt 3 den Bhille—a chur chun cinn sa Ghaeltacht, gan dul i bpáirtíocht leis na daoine a bheidh ina mbun, beidh cumhacht ag Gaeltarra Éireann deontais suas go dtí £2,000 a chur ar fáil. De bharr na cumhachta seo tá súil againn go n-éireoidh le Gaeltarra ceirdeanna éagsúla a chothú ar fud na Gaeltachta.
Tá tábhacht nach beag leis na cumhachtaí breise atá á dtabhairt do Ghaeltarra Éireann faoin mBille seo agus beidh i bhfad níos mó le déanamh ag an mBord feasta. Dá bhrí sin, ba mhaith linn dá mbeadh cemhaltaí ar an mBord agus eolas ar leith acu chun freastal ar gach gné dá ghnóthaí uile. Cúigear atá ar an mBord faoi láthair agus seachtar ar a mhéid a bheidh air feasta faoi alt 4 den Bhille.
Tá feabhas á chur ar chúrsaí airgeadais Ghaeltarra Éireann in ailt 6 agus 7 den Bhille. Saorfar Gaeltarra ón dliteanas atá air chun aisíoc a dhéanamh i leith luach na sócrohainní —£700,000—a aistrírodh chuige nuair a bunaíodh é agus i leith méid na n-airleacan—£355,000—a tugadh dó roimh 1 Aibreán, 1965. Ina theannta sin, ní bheidh air na hairleacain a thabharfar dó feasta a aisíoc go dtí go mbeidh brabús ar a ghníomhaíochtaí. Is le haghaidh gnóthaí caipitil a thugtar na hairleacain atá i gceist. As an bPríomh-Chiste a íoctar iad agus is cabhair iad de bhreis ar na deontais bhliantúla a thugtar do Ghaeltarra as Vóta Roinn na Gaeltachta. Tá uasteorainn £500,000 leis na hairleacain faoi Acht 1957 agus tá an teorainn sin á hardú anois go dtí £2,000,000.
Mar eolas don Seanad ba mhaith liom beagán á rá faoina bhfuil ar siúl ag Gaeltarra Éireann faoi láthair. Tá sé ag gabháil do bhréidín, earraí cniotáilte, bróidnéireacht agus bréagáin a tháirgeadh istigh sa Ghaeltacht nó cóngarach di. Luach timpeall £725,000 de na táirgí sin a díoladh sa bhliain 1964-65. Timpeall 780 oibrí atá i bhfostaíocht lánaimsire i bhfoirgnimh le Gaeltarra agus fairis sin tá suas le 1,000 i bhfostaíocht pháirtaimsire ina dtithe féin; tuairim is £350,000 a íocadh leo mar phá sa bhliain 1964-65. Tá monarchana nua tógtha agus feabhas curtha ar mhodhanna oibre ag Gaeltarra agus tá méadú ag teacht de réir a chéile ar líon na bhfostaithe agus ar luach na ndíolachán i gcoitinne. Is féidir a rá, mar sin, go bhfuil eagar maith anois ar Ghaeltarra chun na tionscail atá idir lámh aige cheana féin a chur cun cinn.
Faoi mar atá leagtha amach sa Pháipéar Bán, is é aidhm atá le beartas an Rialtais don Ghaeltacht gníomhaíochtaí oiriúnacha eacnamaíocha a spreagadh agus a fhairsingiú agus cúrsaí sóisialacha a fheabhsú ionas go mbeidh deiseanna leormaithe ag na daoine a chónaíonn sa Ghaeltacht, agus arb í an Ghaeilge a ngnáthurlabhra, chun fostaíocht shochrach a fháil agus caighdeáin réasúnta mhaireachtála a bheith acu. Chun tuilleadh fostaíochta a sholáthar sa Ghaeltacht tá gá le tionscail eile fós agus, mura gcuireann daoine eile ar fáil iad, beimid ag brath ar Ghaeltarra Éireann é a dhéanamh. Chuige sin beidh cumhactaí agus airgead go leor ar fáil do Ghaeltarra feasta.
Iarraim anois ar an Seanad glacadh leis an Dara Céim den Bhille.