Cuirim fáilte roimh Aire Stáit an Roinn Comhshaoil agus is maith liom go bhfuil an deis seo againn chun an Bille tábhachtach a scrúdú sa Teach inniu. Ta an-chuid scríbhneoireachta agus cainte déanta i leith caomhnú na timpeallachta, le blianta beaga anuas. Cuirimid ceist orainn féin, uaireanta, ag féachaint cá bhfuil ár dtriall nó cén deireadh a bhéas leis an obair seo nó cén sórt comhluadair a bhéas sa tír seo, go mór mór faoin dtuath, má chuirtear gach a bhaineann leis an mBille seo i gcrích. Tá imní orm ina thaobh agus tá an imní bunaithe ar mo thaithí phraiticiúil le dhá scór bliain i gceantar atá an-tábhachtach ó thaobh na timpeallachta de.
Níor fhás tuiscint ar an dtimpeallacht agus a caomhnú sa tír seo go dtí na seachtóidí agus na hochtóidí. Glacaimid leis go bhfuil aos óg na linne seo ag fáil oiliúna sna scoileanna ar an dtimpeallacht agus ar ár gcomhfhreagarthacht ina leith. Rud nua-aimseartha is ea an oiliúint seo. Ní raibh na modhanna múinte againn sna caogaidí ná sna seascaidí chun tábhacht na timpeallachta a chur in iúl do na páistí.
Cloisimid anois go bhfuil gach páiste scoile in ann caint a dhéanamh faoi sraith an "ozone"; tá go leor ráite i dtaobh díothú na bhforaoiseacha báistí, i leabhair atá feiliúnach do pháisti scoile de gach leibhéal. Craoltar eolas ar an dteilifís faoin dochar a dhéanann dóireadh ola do na farraigí. Ní bheadh focal le cloisteáil faoina leithéad, blianta ó shin sa tír seo. Bhí a fhios ag gach duine faoi thubaist Chernobyl agus faoi mar a chuir sé isteach ar an dtír seo agus ar thíortha eile na hEorpa. Is eol duinn conas mar atá atmasféar na príomhcathrach millte le gual agus le deatach.
Baineann an-chuid taispeántas agus beartas a chuirtear isteach ar an gComórtas Eolaíthe Óga san RDS gach bliain leis an dúlra agus le caomhnú na timpeallachta. Is léir go bhfuil an-dul chun cinn déanta maidir le eolas a scaipeadh faoina bhfuil ag tarlú thart orainn.
Ar an dtaobh phraiticiúil dhe, tar éis a bhfuil cloiste agus léite agus foghlamtha ag na páistí faoi chaomhnú na timpeallachta, cuirim céist orm féin cén fáth nach bhfuil na páistí seo níos airdeallaí agus níos cúramaí maidir le ceist an bhruscair, mar shampla. Is cuimhin liom a bhéith ag obair ar Inis Oírr, Oileán Árainn, trí blíana ó shin fad a bhí suas le 200 scoláire ag freastal ar choláiste Gaeilge ann. Is ó Bhaile Átha Cliath a tháinig 80 faoin gcéad de na scoláirí sin. Nach aisteach an rud é, bíodh gur scoláirí iad a fuair ceachtanna faoi ghlaine agus chaomhnú na timpeallachta, gurb iad na gasúir sin a tháinig go hoileán Inis Oírr agus a mhill an t-oileán ó thaobh glaine agus na timpeallachta de i gcaitheamh na dtrí mhí a bhí siad ann. Ba chuma leo, a bheag nó a mhór, faoi pháipéar milseáin, páipéir ar uachtar reoite agus mar sin, á gcaithieamh timpeall, agus nuair a chuir mé stop le cuid acu chun a chur ar a súile dóibh bheith níos airdeallaí agus níos cúramaí faoina n-iompar ó thaobh na timpeallachta de, is amhlaidh go ndearna siad gáire fúm. Is olc an toradh é sin ar ár gcóras oideachais, agus ar ndóigh, ní leis an dream sin amháin a bhaineann an scéal, ach freisin le go leor scoileanna agus daoine eile a thugann cuairt ar áiteanna éagsúla.
Bíodh go bhfuil go leor oibre déanta ar bhealach amháin ó thaobh chaomhnú na timpeallachta de, is é mo thuairim dhaingean go bhfuil an t-uafás eile le déanamh maidir le hoideachas. Ba chóir go mbeadh sé éasca an t-oideachas a thabhairt d'aos óg na tíre ar bhealaí anphraitíciúil. Nuair a bhíonn siad sa bhaile agus ar scoil bíonn orthu bheith cúramach maidir le páipéir a chaitheamh thart, ach nuair a bhíonn siad thiar i gConamara is cuma leo, caitheann siad i dtraipisí iad. Tá ceacht éigin le foghlaim againn ansin agus is ceacht simplí é. B'fhéidir go gceapann daoine, i gcomhthéacs an Bhille mhóir seo atá faoinár mbráid inniu, nach fiú bheith ag caint faoin ábhar seo, ach is iad na rudaí beaga simplí seo a léiríonn intinn an phobail. Nuair a fhágann gasúir timpeallacht Bhaile Átha Cliath le dul siar go Conamara nó áit ar bith eile ar laethanta saoire, ní bhíonn an meas céanna acu ar an dtimpeallacht nádúrtha ansin.
Nuair a mheabhraimid ar an bhfáth go bhfuilimid ag plé Bille den chineál seo, cuirtear in iúl dúinn go bhfuil go leor le foghlaim ón Eoraip agus ó thíortha eile, a rinne dóthain dearmad iad féin, rud atá fíor. Nuair a chuamar isteach san CE, i measc na ndualgas a bhain leis an mballraíocht sin ná caomhnú na timpeallachta. Is é mo thuairim féin gur de bharr brú ón CE atá an Bille seo os ár gcomhair, ach ní aontaím leis an modh oibre atá ag an gComhphobal maidir leis an timpeallacht agus an tír seo. De réir mo thaithí féin, níl rudaí ag feidhmiú i gceart, agus tá rudaí ag tarlú ó thaobh na timpeallachta de nach léir do na riarthóirí ná don phobal. Luaifidh mé sampla amháin. Tá rud a dtugtar "areas of scientific interest" air sa CE, nó áiteanna a bhfuil tábhacht speisialta eolaíochta ag baint leo, ach sula leanaim leis seo ba mhaith liom a rá nach maith liom teideal an Bhille seo, Gníomhaireacht um Chaomhnú Comhshaoil, mar sílim go bhféadfaí teideal níos oiriúnaí agus níos simplí ná sin a chumadh. Ach deir lucht aistriúcháin liom go bhfuil orthu bheith an-dlíthiúil nuair a bhíonn siad ag aistriú ó Bhéarla go Gaeilge.
Ach le dul siar go dtí an ASI seo, áiteanna a bhfuil tábhacht speisialta eolaíochta ag aint leo, céard a rinne an CE? Fuair siad léarscáil na hÉireann ó Bhord na nOibreacha Poiblí agus le cabhair leabhair thagartha, chuireadar ciorcal timpeall an tríú cuid beagnach den tír seo. Chuireadar go leor ciorcal thart ar cheantair Chonamara agus Mhaigh Eo agus áiteanna eile, na ceantair is áille sa tír, agus dúirt siad gur áiteanna seo uilig a raibh tábhacht speisialta eolaíochta ag baint leo. Níl mise ag cur in éadan a leithéide, ná duine ar bith eile ach oiread, mar is rud inmholta é seo, ach tá siad tagtha isteach aniar aduaidh orainn. Má chuireann éinne anseo ceist ar fheirmeoirí i gConamara, i Maigh Eo, nó Sligeach nó áit ar bith eile, gur leo an talamh a bhfuil na ciorcail seo thart timpeall orthu faoin roinnt seo, níl a fhios acu go hoifigiúil nó go neamhoifigiúil go bhfuil sé sin tarlaithe dá gcuid talamh.
Is trua liom nár thug mé an léarscáil isteach lena taispeáint daoibh go bhfuil na mílte acra gearrtha amach, agus tá sé ráite ag an CE gur áiteanna iad seo a bhfuil tábhacht speisialta eolaíochta ag baint leo. Níor tháinig cigire ar bith de chuid na nOibreacha Poiblí chucu le heolas a thabhairt dóibh nó le hiad a cheistniú maidir lena raibh fúthu a dhéanamh. Tá go leor samplaí ar an dul sin le ríomh.
Anois táimid ag caint faoi chaomhnú na timpeallachta sa Bhille seo. Tá suim ar leith agam i dtuairimí daoine nach n-aontódh liom, b'fhéidir. Tá sé curtha i mo leith agus i leith daoine eile a bhfuil baint agam leo i dtionscal an fheilmeoireacht éisc, gur muidne an dream is measa sa tír, go bhfuilimid ciontach i gcoireanna uafásacha in aghaidh na timpeallachta. Ach, tógaimis na ceantair éagsúla seo a bhfuil an oiread sin cainte futhu. An feilmeoir beag seo a bhfuil píosa talún aige, bíodh sé ina phortach nó ina fhoraois, is é an rud a deir Oifig na nOibreacha Poiblí — agus tá sé seo ina ábhar chás cúirte — gur de réir shoc ruithe an CE atá siad ag feidhmiú, gur áit é sin a bhfuil tábhacht speisialta eolaíochta ag baint leis agus thairis sin níltear ag déanamh dochar ar bith don fheirmeoir beag, ach tá dóchar á dhéanamh dó sa mhéid má bhíonn sé ag iarráidh an talamh sin a dhíol, nuair a chloiseann an té atá ag brath an talamh a cheannach uaidh go bhfuil, cornasc air agus nach ceadmhach de réir an CE rudaí áirithe a dhéanamh mar go bhfuil tábhacht eolaí ochta ag baint leis, laghdaítear luach na talún.
Freisin, ní bheadh aon deontas le fáil ag an bhfear sin ón CE, mar shampla. Táimid ag déanamh dlí anseo, Bille atá bunaithe ar phrionsabal Eorpach, ar phrionsabal an CE, agus tá rudaí á ndéanamh anseo atá mícheart. Ní hamhlaidh go bhfuil an prionsabal mícheart, ná go bhfuil an caomhnú mícheart, ach tá easpa chothromaíochta ann, níl an chothromaíocht ann ó thaobh na heacnamaíochta agus chaomhnú an dúlra agus na timpeallachta de. Tá dhá rud i gceist agus ní féidir ceann amháin a scarúint ón gceann eile. Mar a dúirt an Seanadóir Dardis romham, agus é ag caint ar an ábhar seo faoi áiteanna i gConamara agus in iarthar na hÉireann trí chéile, an áit is déine an áit is mó a gcuirfidh sé seo isteach ar shaol dhaoine phríobháideacha.
Mar a dúirt mé, níl tada bunúsach agam ina éadan seo, ach níor caoi bheith ann le go mbeadh a fhios ag daoine go bhfuil sé seo ag tarlú. Ba cheart go bhfaigheadh an duine cúiteamh cóir ar an talamh atá saothraithe nó insaothraithe aige. Níl a fhios agam cén réiteach a bheidh air seo. Tógaimis an t-iarthar arís, mar shampla, Cruach Phádraig, áit mhór oilithréachta agus tá cinneadh déanta faoin timpeallacht nach ceart mianadóireacht a dhéanamh ar an gcnoc. Ar ndóigh, tá sé sin go hiontach. Is beag duine a chuirfeadh in aghaidh an bheartais sin, go háirithe polaiteoirí in iarthar na tíre, mar bheadh vótaí i gceist.
Is é mo thuairim dhaingean, má tá i ndán don saol anois nach féidir aon rud a dhéanamh le Cruach Phádraig mar gheall ar oilithreachtaí, thurasóireacht ná aon chúrsaí eile, gur chóir go mbeadh cúiteamh le fáil. Sin an fáth go n-abraim nach bhfuil an chothromaíocht sa Bhille seo. Tá go leor rialacha ann le rud a stopadh, le pionós a chur ar dhaoine agus lena dtabhairt chun na cúirte, lena gcearta a bhaint díobh as an timpeallacht a mhilleadh, ach ní fheicim, ar an taobh eile den scéal, aon chothromaíocht don duine a gcuirfear isteach air. Beimid ag caint faoin mBille agus na hailt éagsúla atá ann, ach ní bheidh aon chaint ann faoi chúiteamh. Beidh dóthain cainte ann maidir le cé mhéad airgid a bheidh le fáil ag an chief executive officer chun seo agus siúd a dhéanamh, cén dóigh a roghnófar a leithéid seo, agus mar sin.
Ná déanaimis dearmad, agus an chaint seo uilig ann faoin timpeallacht, go bhfuil dochar á dhéanamh d'eacnamaíocht na tíre agus go háirithe sna limistéir thuaithe. Sampla beag eile: bhí an-raic anseo breis agus bliain ó shin nuair a bhí lucht gnóthaí Baile an Chlocháín i gConamara ag iarraídh tuairím is 100 acra portaigh. Bhí iarratas ístigh go dtógfaí aerstráice ag an gClochán, rud a chabhródh go mór leis an turasóireacht, ach cuireadh go tréan in aghaidh a leithéide, in aghaidh na daoine cróga misniúla a bhí thiar sa Chlochán, iad scoite amach ón gcuid eile den tír, agus iad ag iarraidh rud éigin a dhéanamh ar a son féin chun a gcúinsí eacnamaíochta agus sóisialta a fheabhsú. Téann sé sin lom díreach in aghaidh prionsabal atá sa Bhille ó thaobh caomhnú na timpeallachta de. Cuireadh i mo leith-se agus i leith daoine eile go rabhamar ag milleadh na timpeallachta. Mar a luaigh an Seanadóir Dardís tugadh daoine isteach ón Ísiltír a bhí tar éis ceacht a fhoghlaim trína bportaigh féin a mhilleadh; tugadh daoine isteach ó Shasana agus ó Bhaile Átha Cliath — an tarm glas a thug mise orthu. Rinne lucht na meáin cumarsáide ionsaí uafásach ar iarracht na ndaoine seo chun a gcuinsí eacnamúla a fheabhsú. Ní raibh duine amháin díobh seo í gcoinne caomhnú na timpeallachta nó caomhnú an cheantair, mar tuigeann said go rí-mhaith gur dá leas féin an chaomhnú seo.
Níor thuig daone ag an tráth sin ná ní thuigeann siad fós go raibh 24 míle acra de phortach ansin agus nach raibh i gceist ach imeall beag ar bhruach bhaile an Chlocháin — 50 nó 100 acra ar a mhéid — a usáid chun aer stráice beag a thógáil ann. Cuireadh glan ina aghaidh. Níor tugadh cead pleanála dóibh toisc go raibh ciorcal beag ag Oifig na nOibreacha Poiblí timpeall na háite sin i nganfhios do mhúintir an Chlocháin agus i ngánfhios dón fhear ar leis an portach. De réir an diúltú ceada, ba limistéar é seo a bhí ainmnithe ag an CE mar cheantar a raibh tábhacht speisialta eolaíoch ag baint leis agus nárbh fhéidir cead pleanála a thabhairt. Fillim ar mo bhuncheist arís nuair a fhiafraím cén áit sa Bhille seo a bhfuil leas eacnamiúil an phobail i gceist chomh maith le leas na timpeallachta? An rud is mó a chur fearg orm agus muid ag caint faoi chaomhnú na timpeallachta i leith an Bhille seo ná gur tháinig fear uasal ab ainm dó Bellamy ar Raidio Éireann agus gur thug sé "Amadáin" ar mhuintir an Chlocháin toisc go ndearna siad iarracht aerstráice a dhéanamh, ansin. B'éigean dó é sin a tharraingt siar go poiblí. Mar a dúirt mé, mura bhfuil cothromaíocht ann idir an dá thaobh, an timpeallacht agus an eacnamaíocht, beidh siad ag tarraingt as a chéile.
Tá go leor samplaí againn anois a léiríonn domsa go bhfuil lochtanna móra ar an gcaoi a bhfuilimid ag dul i mbun caomhnú na timpeallachta. Ní dóigh liom go bhfuil réiteach na faidhbe sa bhille seo. Níl an dá intinn tagaithe le chéile ó thaobh chaomhnaithe, eacnamaíochta agus saol tuaithe na tíre. I leith na heacnamaíochta, tháinig Bord na Móna isteach agus bhain siad na portaigh i lár na tíre, agus anois táthar ag rá gur dhona an rud é sin a dhéanamh. De bharr go raibh muintir an iarthair scoite amach ar an chósta, bhí siad deireanach ó thaobh bheith ag forbairt go heacnamúil. Anois nuair atá an deis acu siúd dul chun cinn le forbairt, tá an rud mór seo ar a dtugtar "caomhnú an imshaoil" tagaithe chun tosaigh orthu agus á dtachtadh agus ag tachtadh aon dul chun cinn is féidir a dhéanamh ar thalamh bocht an iarthair. Tá bac orthu aon rud a dhéanamh leis na portaigh. Níl mé in aghaidh agus ní raibh mé riamh in aghaidh chaomhnú an phortaigh, an "blanket bog" mar a thugtar air. Ach má táimid ag iarraidh go mbeadh pobal tuaithe ann ní féidir bheith ag baint agus ag baint agus gan tada a thabhairt.
Tá mé ag caint go príomha faoi iarthar na tíre. Tá chuile dhuine ag caint faoin a cheantar féin. B'fhéidir go gcuirfear i mo leith go bhfuil mé paróistiúil ach aon rud a bhíonn le foghlaim againn bíonn sé le foghlaim sa bhaile, agus nuair a fheiceann tú rudaí ag tarlú i do cheantar féin, caithfidh tú labhairt futhu. Tá cosc anois ar chrainn. Tá aithne agam ar fhéirmeoirí beaga a bhfuil dhá mhíle acra de shliabh acu agus tá sé coscaithe orthu crainn a chur, de bharr laincisí an Bhille seo. Is é an Bille seo atá ag tabhairt feidhmiú do rialacha atá ag teacht ón gComhphobal Eorpach. Táthar ag rá anois go ndéanann na foraoiseacha seo a bhíothas lena chur ar shléibhte, dochar don dúlra, idir aibhneacha agus fharraige. Caithfimid glacadh leis seo. Ní fhaca mé Aire Stáit ar bith, áfach, ag dul ar ais go dti na feirmeoirí seo chun a rá leo nach féidir leo rud a dhéanamh leis an bpíosa sléibhe atá acu, seachas é a dhíol, más féidir leo. Tabharfar cúiteamh dóibh agus is é a bhéas mar thoradh ar an ngníomh ná bánú na tuaithe do bharr na constaicí móra a chuirtear i bhfeídhm in ainm caomhnú na timpeallachta.
Céard is tábhachtaí ar an saol seo — caomhnú na timpeallachta nó caomhnú an duine; caomhnú an iascaire nó caomhnú na farraige áit a bhfuil sé ag obair? Tá sé deacair a fhreagairt. Deirtear go gcaithfear an duine, an daonra agus an t-aonad teaghlaigh a chaomhnú ach ag an am gcéanna, ní mór dúinn an timpeallacht a chaomhnú, freisin. Tá deacrachtaí agamsa leis an réiteach seo ó thaobh an teaghlach a choimeád beo go heacnamúil agus an dúlra a chaomhnú ag an am céanna do shliocht ár sleachta amach anseo.
Tá amhras mór ormsa faoin mhaitheas a dhéanfaidh an Bille seo agus conas mar a rachaidh sé chun tairbhe an teaghlaigh ar chósta iarthar na hÉireann, ó Dhún na nGall go Ciarraí. Cén mhaitheas é muna mbeidh tairbhe ann do dhaoine?
Tá roinnt mhaith le rá agam faoi chaomhnú na farraige, maidir le timpeallacht, tránna, uisce doimhim agus uisce éadoimhin ach ní fheicim tagairt ar bith don fharraige sa Bhille seo. Níl a fhios agam an ormsa atá an milleán toisc nár aimsigh mé a tuairisc. Tá an fharraige ar cheann de na hacmhainní nadúrtha is luachmhara atá againn. Ná déanaimís dearmad gur oileán í Éire, an t-aon oileán i gComhphobal na hEorpa. Bheadh sé suimiúl, dá ndéanfadh duine éigin scagadh ar an mBille seo feáchaint cé mhéad uair a luaitear an focal "sea" ann. Is í an fharr aige an acmhainn nadúrtha is tábhachtaí atá againn toisc go dtéann gach abhainn isteach ann ar deireadh, is cuma cá bhfuil eirí uirthi nó cén contae trína ghabhann sí. Bíonn a fhíos ag an bpáiste scoile sa triú nó sa cheathrú rang bunscoile go mbaineann an fharraige le gach a bhfuil ag tárlú sa tír.
Seachtain ó shin, chuir mé rún síos sa Teach ag fiafraí d'Aire na Mara soiléiriú a dhéanamh ar scéal a tháinig ón gComhphobal Eorpach i dtaobh na ASIs — áiteanna a bhfuil ard-cháiliocht speisialta eolaíoch ag gabháil leo — agus maidir le scéal a tháinig i nganfhios go bhfuil na farraigí thiar i gcuan Chill Chiaráin agus na Beirtrí Buí i gConamara tar éis athrú stádais oifigiúil a fháil ón gComhphobal Eorpach. Ceantair shliogéisc ab ea iad agus ceantair feirmeoireacht bhradáin is ea iad anois. Is beag nár thit muintir Chonamara Thiar as a seasamh nuair a chuala siad é sin. Beidh 300 feirmeoirí agus iascairí beaga thíos leis. Tá na daoine seo beag, ní ó thaobh méid de ach ó thaobh acmhainní dhe, agus tá siad suite idir Chloch na Rón agus Leitirmealláin, i gCarna, i Rosmuc agus i Leitir Mór.
Tá na daoine seo tar éis comharchumann áitiúil a bhunú; tá siad ag obair agus ag comhoibirú leis na Ranna Stáit agus le Bord Iascaigh an Iarthair ó thaobh monatóireachta, glaineachta agus rialacha a chomhlíonadh dhe. Tá deireadh leis na leapacha oisrí a bhí ann ag dul siar go dtí an 16ú aois, tar éis d'Údarás agus d'Aire na Gaeltachta agus don Chaibinéid breis agus £1 mhilliún a chaitheamh air seo. Bhí gach cruthú ann go raibh sé ag dul ar aghaidh go maith agus bhí idir 200 agus 300 feirmeoirí beaga ag baint usáide agus airgid as, ag cur leis an maoin aiceanta agus eacnamaíochta atá acu.
"The Irish authorities have informed us" atá scríofa ann, go bhfuil deireadh le feirmeoireacht shliogéisc sa cheantar sin. Is de bharr an Bhille seo atá a leithéid ag tárlú i nganfhios beagnach, do na daoine a bheas thíos leis.
Is beag contae sa tír nach bhfuil baint éigin aige leis an bhfarraige agus feicfear an rud céanna ag tarlú thart faoin gcósta, in ainm chaomhnú na timpeallachta. Aontaimíd uile maidir leis na buntáistí a ghabhann le timpeallacht ghlan. Ach ní ghlacaimid leis ná ní thuigimid an t-easpa cothromaíochta ar cheart a bheith sa Bhille seo idir dhul chun cinn eacnamúil na ndaoine agus caomhnú na timpeallachta.
Tá an-ghá le caomhnú na timpeallachta i gcás feirmeoireacht éisc. Tá an-diomá orm nach bhfuil cur síos ná rialacha sa Bhille seo maidir le truailliú nó caomhnú na farraige, ach déantar trácht ar rialacha a dhéanamh maidir le gach a théann isteach sa bhfarraige ó thaobh séarachais de. Tá bliain gafa thart ó chuaigh Bille um Foras na Mara tríd an Teach seo, agus tá sé anois ina dhlí. An bhfuil comhoibriú i gceist idir an Bhille seo agus na Billí a ghabh roimhe, ar an ábhar céanna? Ní fheicim go bhfuil Bille um Foras na Mara luaite sa Bhille seo, agus is dona nach bhfuil, mar is ar an bhfarraige is mó is cóir dúinn béim a chur. Tá an-chuid mí-thuiscintí ann faoi láthair maidir le hoibriú, glaineacht agus truailliú na farraige de, agus ní mór na mí-thuiscintí seo a ghlanadh suas.
Nílimid ag iarraidh truailliú farraige a cheadú. Nílimid sásta ach oiread go gcuirfear as riocht an chothramaíocht a ba chóir a bheith ann idir chaomhnú farraige agus saol eacnamaíochta na ndaoine atá ag obair ar an bhfarraige. Déanadh trácht an tseachtain seo caite ar staidéar a dearnadh ar an mbreac farraige agus ar a dhíothú as an bhfarraige. Níl sé le fáil timpeall ar chósta na Gaillimhe níos mó, de thoradh galair agus míoltóga farraige. Dearbhaíodh gurbh iad na feirmeoirí bradáin a ba chúis leis an truailliú seo. Ní dúirt an staideár é sin go baileach ach b'shin mar a dúradh sna nuachtáin, a bhí claonta i gcoinne na bhfeirmeoirí seo. Shílfeadh duine ar bith a léigh an tuairisc gurbh iad na feirmeoirí éisc a ba chúis leis na fadbhanna uilig.
Ní mór a mheabhradh dúinn féin go bhfuil an-chuid gnéithe i gceist maidir le truailliú na farraige. Ní bhaineann sé le feirmeoirí éisc amháin mar a agródh nuachtáin agus teilifís. Níl an chothromaíocht cheart ann ó thaobh forbairt eacnamúil agus caomhnú timpeallachta de. Is í an deacracht is mó a fheicim-se leis an mBille seo ná cothromaíocht a bhaint amach maidir leis an dá phrionsabal seo.
Ar na gnéithe eagsúla a bhaineann le caomhnú timpeallachta, tá comhairlí contae, monarchana móra, séarachas as na bailte. Ar deireadh thiar déanann gach rud, gach dramhail agus gach truailliú, a bhealach ó na haibhneacha chuig an fharraige agus is í an fharraige bun agus barr ceist an chaomhnaithe. Tá go leor rudaí sa Bhille faoin stádas a bheas ann agus faoi foras a bhunú le rudaí a dhéanamh, ach níl mé cinnte a bheag nó a mhór go bhfuil leigheas an scéil istigh anseo.
Bhí mé sa Teach nuair a dúirt an Seanadóir Honan seachtain ó shin go raibh sí cineál imníoch faoin struchtúr atá istigh anseo. Luaigh sí go speisialta na boird sláinte atá timpeall na tíre agus an chaoi ar fhás siad; gur deineadh sliabh mhór de rud beag, agus go bhfuil an oiread sin ama, dúthrachta, airgid, speisialtóireachta, seo siúd agus uile, bainteach leis na boird seo anois gur beag airgid atá fágtha don bhfear nó don bhean sínte in ospidéal. Tá fás mór cruthaithe ar bhealach éigin nach bhfuil chun leasa, dar liomsa nó dar le go leor daoine ag deireadh an lae, don ghnáth-dhuine thíos ar an dtalamh.
Cuirimid uilig míle fáilte roimh rud ar bith atá le déanamh leis an timpeallacht a chaomhnú, ach an bealach le gníomhú, sin an fáth go bhfuil mise amhrasach. Ní faoi na haidhmeanna atá ansin; tá na haidhmeanna go hálainn agus na prionsabail go deas ann. Ach sa tír beag seo faoi láthair tá 87 de ranna Rialtais de chineál amháin nó de chineál eile ag plé le cúrsaí sláinte ó thaobh séarachais agus rud ar bith a bhaineann le truailliú. An faitíos atá orm faoin Bhille seo go bhfuil mé ag ceapadh nach mbeidh ann arís ag deireadh an lae ach gluaiseacht mhór daoine ag iarraidh rud a chur chun cinn agus gan a fhios acu cá bhfuil siad ag dul, nó cén chaoi a dhéanfar an struchtúr seo nó cén bealach a dhéanfar an dlí seo a chur i bhfeidhm i dtreo is go mbeidh toradh ceart leis. Tá an oiread sin reachtaíochta ag an Roinn Comhshaoil le blianta. Tá Achtanna ann, mar shampla, a bhaineann le luas bóthair, le caitheamh crios sabhála, le brúscar, le toghcháin, le pleanáil agus go leor ábhar eile Is í an cheist atá mise á cur ná, cé chomh maith is a d'éirigh leis an hAchtanna sin, agus cé chomh maith is atá siad ag obair? Cén toradh atá orthu, má tá toradh ar bith ar chuid mhaith acu? Agus cén maitheas atá á dhéanamh acu? Tá go leor Achtanna curtha tríd ag an Roinn Comhshaoil le blianta anuas nach bhfuil infheidhmthe agus níl siad á bhfeidhmiu, dar liomsa, go foirfe agus i gceart.
Sin an fáth go bhfuil faitíos orm go bhfuilimid ag dul ag bunú córais nua mór eile. Céard le haghaidh? Chun an dúlra agus an timpeallacht a chaomhnú a deirtear, le chuile shórt a tharraingt le chéile sa chaoi go mbeidh siad uilig ag feidhmiú le chéile agus go mbeimid uilig ag obair as lámha a chéile, go mbeadh aonad amháin speisialta ann ag plé leis an dúlra agus le gach a mbaineann leis.
Tá sé an-deacair dom a thuiscint cén chaoi a bhféadfaí sin a dhéanamh, nuair atá cúrsaí chomh dona sin sa tír is atá siad, ó thaobh truaillithe de. Tá sé an-deacair a thuiscint, mar shampla, go bhfuil bailte beaga ar chósta na tíre — tóg bailte Chonamara, An Spidéal, Bearna, Carna, An Cheathru Rua, An Clochán, — agus na háiteanna sin go léir — gan aon chóras speisialta séarachais in aon cheann acu siúd. Is é sin, tá an séárachas as na bailte beaga sin go léir ag dul díreach isteach sa bhfarraige gan aon rúd déanta faoi. Is ait liom go bhfuilimid ag caint faoi Bhille anseo inniu a deireann nach mbeidh aon truailliú ar bun sa bhfarraighe nó ar an dtalamh agus ag an am ceanann chéanna go bhfuilimid ag tabhairt ceada do na húdaráis áitiúla séarachas, gan aon chóras speisialta á chur ar bun iontu, a ligint isteach sa bhfarraige chun dochar agus truailliú a dhéanamh.
Mar shampla, téann an séarachas poiblí amach sa trá sa Spidéal, agus tarlaíonn an rud céanna i mBeárna agus áiteanna eile. Ansin táimid ag caint faoin truailliú, faoin timpeallacht agus faoi céard a tharlós amach anseo. Is mór an scannal é go bhfuil na tithe inaistrithe nó demountable homes mar a thugann siad orthu, le feiceáil ar thalamh nó amuigh faoin dtuath, bíodh siad i gConamara nó in áit ar bith eile. Is uasfásach an caitheamh anuas orainn féin agus ar na húdaráis áitiúla go bhfuil muidne ag ceadú a leithéid sin, go bhfuil muid sásta glacadh len a leithéid sin. Cé mhéid tithe chomhairle chontae atá ann, mar shampla, gan aon séarachas iontu nó gan aon uisce iontu? Agus anois táimid ag caint ar an Bhille breá seo.