Inniúlacht sa Ghaeilge sa Státseirbhís

Dáil Éireann Debate, Wednesday - 6 April 2016

Wednesday, 6 April 2016

Ceisteanna (361, 362)

Éamon Ó Cuív

Ceist:

361. D'fhiafraigh Deputy Éamon Ó Cuív den Aire Dlí agus Cirt agus Comhionannais cad é an líon iomlán foirne atá fostaithe ina Roinn faoi láthair; cé mhéad duine acu siúd atá ag feidhmiú i bpoist atá daingnithe (i scéim teanga, nó ar aon bhealach eile) mar phoist a bhfuil riachtanas Gaeilge ag baint leo; an bhfuil sé i gceist aon phoist eile de chuid na Roinne a aithint mar phoist a bhfuil riachtanas Gaeilge ag baint leo; agus an ndéanfaidh sí ráiteas ina thaobh. [5827/16]

Éamon Ó Cuív

Ceist:

362. D'fhiafraigh Deputy Éamon Ó Cuív den Aire Dlí agus Cirt agus Comhionannais an bhfuil sé mar dhualgas oifigiúil ar bhaill foirne aonair ar leith de chuid a Roinne seirbhís a sholáthar trí Ghaeilge d’aon duine a lorgaíonn í nó an ar bhonn deonach amháin a thoilíonn baill foirne a Roinne seirbhís trí Ghaeilge a sholáthar; agus an ndéanfaidh sí ráiteas ina thaobh. [5843/16]

Freagraí scríofa

Minister for Justice and Equality

Tógfaidh mé Ceisteanna Uimhireacha 361 agus 362 le chéile.

Tá thart ar 1900 ball foirne ar fostú i mo Roinnse. Tá post amháin ag an Roinn faoi láthair, post Aistritheora, a bhfuil sé riachtanach go mbeadh an sealbhóir dátheangach go feidhmiúil sa Ghaeilge agus sa Bhéarla. Is é príomhról an Aistritheora Rialacha Cúirte a aistriú go Gaeilge.

Níl aon ghá, ag an tráth seo, go n-aithneodh mo Roinn aon phoist bhreise a mbeadh sé riachtanach go mbeadh inniúlacht sa Ghaeilge ag iarrthóirí orthu.

Ina theannta sin, tá cohórt de níos mó ná 40 oifigeach sa Roinn atá ar fáil chun seirbhísí a sholáthar (i.e. ceisteanna agus fiosruithe a fhreagairt) i nGaeilge.