Dáil Éireann Debate, Tuesday - 4 October 2016
345. D'fhiafraigh Deputy Pearse Doherty den Aire Ealaíon, Oidhreachta, Gnóthaí Réigiúnacha, Tuaithe agus Gaeltachta an gcuirfear níos mó cuidiú airgid ar fáil mar chuid de scéim na gcúntóirí teanga i bhfianaise na scoileanna breise atá ag glacadh páirte ann; agus an ndéanfaidh sí ráiteas ina thaobh. [28203/16]
Amharc ar fhreagraBunaíodh Scéim na gCúntóirí Teanga in 1999 ar bhonn píolótach chun an Ghaeilge a láidriú mar theanga labhartha i measc aos óg na Gaeltachta agus iompar teanga scoláirí scoile a chur i dtreo na Gaeilge. Tá infheistíocht shuntasach déanta ag mo Roinn sa scéim seo ó shin i leith.
Tá deontas gur fiú €718,578 in iomlán ceadaithe agam do Mhuintearas Teo agus d’Oidhreacht Chorca Dhuibhne don scoilbhliain 2016/17 le cumasú dóibh beartais na scéime a chur i bhfeidhm thar ceann mo Roinne.
I bhfianaise na n-éileamh breise ar an scéim agus an imní atá léirithe faoi chostais riaracháin, tá iarrtha agam ar oifigigh mo Roinne an cás a phlé le hÚdarás na Gaeltachta. Déanfaidh mé an cheist a mheas tuilleadh nuair a bheidh torthaí an phróisis sin ar fáil.
