Maoiniú d'Eagrais Ghaeilge

Dáil Éireann Debate, Wednesday - 26 July 2017

Wednesday, 26 July 2017

Ceisteanna (1293, 1294)

Catherine Connolly

Ceist:

1293. D'fhiafraigh Deputy Catherine Connolly den Aire Cumarsáide, Gníomhaithe ar son na hAeráide agus Comhshaoil an aontaíonn sé go bhfuil ról lárnach ag na meáin i slánú agus fás na Gaeilge agus, chuige sin, an mbeidh sé sásta bualadh le toscaireacht ó Raidió Rí-Rá chun plé a dhéanamh ar a bplean an tseirbhís dhigiteach atá acu a leathnú amach chun bheith ina seirbhís raidió Gaeilge, a bheidh dírithe ar dhaoine óga agus ar fáil ar FM go lánaimseartha ar bhonn uile-oileáin; agus an ndéanfaidh sé ráiteas ina thaobh. [35700/17]

Catherine Connolly

Ceist:

1294. D'fhiafraigh Deputy Catherine Connolly den Aire Cumarsáide, Gníomhaithe ar son na hAeráide agus Comhshaoil an aontaíonn sé le Comhchoiste an Oireachtais don Ghaeilge go bhfuil deis ann, i bhfianaise a bhfuil bainte amach ag TG4 ó bunaíodh é fiche bliain ó shin, céim shuntasach chun cinn a dhéanamh in úsáid na Gaeilge ag daoine óga trí sheirbhís raidió Gaeilge a bhunú, a bheidh dírithe ar dhaoine óga agus ar fáil ar FM go lánaimseartha ar bhonn uile-oileáin, agus an mbeidh sé sásta bualadh le lucht bainistíochta Raidió Rí-Rá chun é seo a phlé; agus an ndéanfaidh sé ráiteas ina thaobh. [35701/17]

Freagraí scríofa

Minister for Communications, Climate Action and Environment (Deputy Denis Naughten)

Freagróidh mé ceist 1293 agus ceist 1294 le chéile.

Forálann an tAcht Craolacháin 2009 don chreat reachtúil le haghaidh ceadúnú agus rialáil seirbhísí craolacháin agus ilphléacs in Éirinn. Leis an Acht sin bunaíodh Údarás Craolacháin na hÉireann (ÚCÉ) mar chomhlacht reachtúil neamhspleách chun ábhar a rialáil i ngach seirbhís chraolacháin Éireannach.

Tá ÚCÉ freagrach as seirbhísí craolacháin raidió neamhspleácha a cheadúnú in Éirinn agus leagtar amach i gCuid 6 den Acht Craolacháin 2009 an mheicníocht faoina dtabharfaidh ÚCÉ faoin bpróiseas ceadúnaithe le haghaidh seirbhísí raidió tráchtála, pobail, sealadacha agus institiúideacha. Níl aon fheidhm agamsa i gceadúnú seirbhísí craolta.

Tá ÚCÉ ag glacadh le haighneachtaí faoi láthair ó pháirtithe ar spéis leo seirbhísí craolacháin fuaime tráchtála breise a sholáthar. Cuid den taighde don athbhreithniú ar an Straitéis um Sheirbhísí Craolacháin atá ann faoi láthair a bheidh sna haighneachtaí seo.  Tá tuilleadh sonraí le fáil anseo: http://www.bai.ie/ga/consultations/glaoch-ar-aighneachtai-leasa-de-sheirbhis-craolachain-fuaime-trachtala-nua/

Beidh mé ag seoladh aip nua Raidió Rí-Rá san fhómhar agus buailfidh mé le lucht bainistíochta an stáisiúin ansin.