Tá £596 de bhreis ar Mheastachán na bliadhna 1939-40 thar mar bhí an bhliadhain roimis. Ní'l ach an méid sin de bhreis sa deire thiar, bíodh go bhfuil £6,150 de bhreis ar Mhírcheann amháin, agus breis de £1,500 agus £1,675 ar dhá Mhírcheann eile, mar go bhfuil súil le cúiteamh as na leithreasaí-i-gCabhair.
Tá soláthar déanta sa Meastachán do (a) Fuireann na h-Árd-Oifige, (b) Fóirne, abhair, gléas agus costaisí ilghnéitheacha a bhainfidh le Gnóthaí Tuatha, (c) Ceannach Ceilpe agus Carraigíne, (d) Costaisí a bhainfidh le h-earraidhe do chur ar an margadh, (e) Deontaisí fé Achtanna na dTighthe (Gaeltacht) agus costaisí chun críche na nAcht.
Ní misde a mhíniúghadh go bhfuil na Tionnscaill Tuatha roinnte ina dtri gcoda, (a) Figheadóireacht, (b) Cniotáil agus (c) Déanamh Bréagán. Tá fear ceannais maraon le triúr lucht conganta i mbun figheadóireachta, nó déanamh an Bhréidín. Tá cniotáil á dhéanamh i dtriocha éigin áit thall agus i bhfus sa Ghaeltacht, agus an obair fé stiúradh ag bainistreás i ngach áit acu. Beidh obair na mBréagán á stiúradh ag bainisteóir agus beirt fhear ceannais. Is tuigthe go mbeadh oibreacha de'n tsaghas-san, agus iad scaipithe annso agus annsúd, costasach go maith, ach san am chéadna is mór is fiú go bhfuil obair sheasmhach dá soláthar do sheachtmhó figheadóirí, agus go bhfuil ocht gcéad ag gabhail de chniotáil, maraon le seachtmhó cailín atá ag obair lán-aimsireach i Monarchain na mBréagán i gCuan Eilidhe. Do cuireadh dathad buachaill as obair de dheascaibh an teine mhillteach a bhí tamall ó shoin sa monarchain sin, ach táthar ag braith go mbeidh i bhfad níos mó ná san fostuighthe ar ais nuair déanfar an mhonarcha d'aiththógaint.
Chithfear mar sin go bhfuil obair dá soláthar go míle duine, nach mór, agus go bhfuil Seirbhísí na Gaeltachta ar cheann de sna naoi gcomhlucht déag ar fhithid sa tír seo ag a bhfuil os cionn chúig chéad de lucht oibre. Fé sgéim na Roinne is féidir leis na h-oibridhthe an meán-tuarasdal seo leanas a thuilleamh—in aghaidh na seachtmhaine— Fígheadóirí, púnt is deich sgillinge. lucht Cniotála, púnt seacht sgilling is raol: oibridhthe láimhe, dhá sgilling déag is raol: agus lucht déanta bréagán, púnt.
Do mhínigheas go minic cheana go ndeintear earraidhe do chostáil annso sa lár-ionad, ag daoine eolgasacha, agus gurb'é bunadhas an chostála san, ná, luach na n-abhar, páighe agus mion-chostasaí, maraon le breis réasúnta le h-aghaidh chinnchostasaí. Dá bhrígh sin, ba cheart ná beadh aon chailleamhaint ar na gnóthaí seo againne, agus ní bhéadh leis, dá mba rud é go mbeadh an obair á déanamh i dteannta chéile sa ghnáth chuma, in ionad a bheith á déanamh in áiteanna aistreacha, iargcúltacha, i bhfad ó'n margadh. Ní féidir gan cailleamhaint trom do thárla agus an obair do bheith á déanamh ar an gcuma san. Is gnáthach earraidhe do dhéanamh i gcoinnibh órduighthe, lasmuich d'earridhe gurb' eol go mbeadh glaodhach maith ortha: deintear a sheachaint, chomh fada agus is féidir é, ná béadh cnósach ró-mhór idir lámha aon tráth. Tugtar an saghas céadna earradh le déanamh do sna h-oibrí san ionad céadna, i dtreó, le h-imtheacht aimsire, go mbeid oilte go maith ar a gcuid oibre, agus go mbeidh luach-saothair dá réir ag dul dóibh.
Is beag athrú ó'n bhliadhain anuraidh atá an an Meastachán i Mírcheann A. Tá fó-oifigeach fóirne sa mbreis anois toisc oifigeach de'n ghrád san do bheith in áit fó-oifigeach feidhme go mbíodh a thuarastal ar Vóta Choimisiún na Talmhan. Tá árdú £525 sa Mírcheann toisc bónus an chostais bheatha do bheith suas agus toisc árdúchán bliadhantamhail ar thuarastail. I Mírcheann B., déantar soláthar do chostaisí tastil, agus tá árdú ann de £50 toisc líon na n-ionad do bheith ag dul i méid, agus toisc an iniúchadh is gádh i monarchain na mbréagán. Tá laghdú i Mírcheann C. toisc ath-gléasa a deineadh ar áis an Telefóna. Is féidir an t-árdú de £612 atá i Mírcheann D. 1 do chur i leith, (a) gnáth-bhreis fuirinne agus méid an chostais bheatha, (b) Bainistreás do'n ionad nua i mBun Beag, araon le h-árdú páighe do Bhainistreásaí lagthuarastail, agus (c) tuarastal Bhainisteóra Ghnótha do Mhonarchain na mBréagán. Tá Mhírchinn D. 2, D. 3 agus D. 4 soléir go leor ionnta féin, agus ní'l gádh le h-aon cur síos do dhéanamh ortha.
Maidir le Mírcheann D. 5, ní gádh, de bhárr ceannach agus deisiúchán in sna blianta ghaibh tharainn, ach £600 do lorg i mbliana.
An soláthar a deineadh fé Mhírcheann D 6 i gcóir na bliadhna 1939-39 níor leór é, agus táthar ag lorg £23,000 i mbliadhna, breis de £1,500 le h-aghaidh riachtanaisí na dtionnscal: an bhreis díolaidheachta le n-a bhfuil súil, tá sé áirithe ins na Leithreasaí-i-gCabhair. As an suim seo de £23,000, tá £11,700 le h-aghaidh snáith agus críche an bhréidín agus £11,300 le h-aghaidh snáith agus uile d'earraidhe chniotála. Faightear abhair tré Stór na Post-Oifige, fé chóras na hOifige sin, agus bíonn cothrom na féinne le fághail ag abhair de dhéantús na h-Eireann. Go dtí seo, fáiríor, níor bh'fhéidir mór chuid dár riachtanaisí, i bhfuirm snáith, d'fhághail in-Eirinn, ach tá gach iarracht á dhéanamh le deis an scéil seo do thabhairt chun críche. I Mírcheann D 7 tá laghdú de £75 a thárla tré maolú do bheith déanta ar shomplaí do chostaiméirí, agus comhgair pácála do bheith ceapuighthe. Do bheadh an laghdú so níos mó fós, mar mbeadh costaisí iompair do bheith suas de barr fás an mhargaidh. Leis an fás atá ar Thionnsgal na mBréagán, luigheann sé le réasún go mbeadh na riachtanaisí fé Mhírcheann D 8 ag dul i méid. Tá an soláthar atáthar á lorg d'abhair bunaiththe ar luach £1,500 earraidhe do bheith dá ndéanamh in-aghaidh an mhí. Tá súil le mór-chuid de'n chostas so do theacht isteach sa bhliain reatha, mar leithreas-i-gcabhair.
Ba mhaith liom a radh annso go bhfuil súil agam le dul chun chinn maith i Monarchain na mBréagán. Roimh an Tóiteán bhí luach £1,200 de bhréagáin á ndéanamh in-aghaidh na míosa. Tá áthas orm a rádh go bhfuil an obair ar siubhal arís anois, in-ionaid shealadacha. Tá feabhas ag teacht ar na Bréagáin ó lá go lá agus beidh ar ár gcumas dul ar aghaidh mar sin go dtí go dtógfar monarcha nua. Tá na h-earraidhe seo a déantar i gConndae Muigheó chomh maith agus chomh saor le rudaí de'n tsaghas céadna ó thíortha eile. Díoltar cuid mhaith de na bréagáin Bhoga; na Bábóga agus na Málaí Siopadóireachta.
Tá go leór órduighthe le fagháil in-Eirinn agus fuaireamar órdú mór ó Shasana le goirid. Táimíd lán-tsásta leis an slighe ar ghlac na h-oibrightheóirí leis an teagasg a tugadh dóibh. Is féidir leó tosnú ar earraidhe nua agus somplaí nua a dhéanamh go tapaidh. Tá súil againn, mar sin, go mbeidh ar ár gcumas an margadh ar fad in-Eirinn a shásamh agus cuid mhaith bréagán a chur thar sáile. Is cosamhail go bhfuil na custuiméirí lán-tásta leis na h-earraidhe mar fritheadh moladh uatha gan é a iarradh ar chor ar bith. Deirtear go dtaithnigheann na saghasanna nua bréagán atá againn le daoine, go bhfuil na luachanna ceart agus go bhfuil an déanamh go maith.
Is ró-bheag an deifríocht atá idir soláthar na bliadhna so agus an bhliadhain anuraidh, fé Mhírchinn E.1 agus E.2. Is léir go bhfuil deire leis an margadh a bhíodh ann d'iodín, ach tá glaodhadh ar cheilp mheilte, le cur imbia do stoc. Le bliadhain nó dhó do theip ar an Roinn go leor ceilp d'fhagháil do'n margadh so, agus i mbliadhna táthar chun praghas níos aoirde do thairisgint uirthe.
Teastuigheann suas le míle tonna ceilpe sa mbliadhain, ach anuraidh ní fuaradh ach chúig chéad tonna, agus athrú-anuraidh, cheithre chéad tonna. Tá soláthar déanta le 800 tonna ceilpe agus 800 tonna feamainne do cheannach i mbliadhna. Tá glaodhadh ar an bhfeamainn le déanaí, ach ní fios fós cionnus a raghaidh an scéal so chun chinn. B'é an meadhoníocaidheacht an duine, a fuair lucht ceilpe anuraidh, ná £8 6s. 0d. Níl aon dul chun cinn ag teacht ar an margadh atá do charraigín mar bhia, agus mar sin, sé an suim céadna atá sa Meastachán airís i mbliadhna. An lagú atá tar éis teacht ar luach na frainnce, tugann sé cothrom ró-mhór do charraigín na Frainnce ar an margadh, agus dá dheascaidh sin, tá ag dul dian ar charraigín, ach níl an oireadh dí á cheannach. An socrú atá déanta le Comhlucht Gnótha, lasmuich, chun an charraigín seo do cheannach, tá sé sásúil go leór. Do cuireadh somplaí go dtí comhlucht in Americe, le déanaí, agus, má thugann na somplaí sin teist mhaith uatha thall, is dóchaighe go mbeidh margadh maith do charraigín sa tír sin.
Tá árdú de £1,894 ar an gcostas a bhaineann le Gaeltarra Eireann agus thárla san de bhrigh, (a) árdúcháin bhliantamhla ar thuarastail, (b) páirtaidheacht in Aonach an Domhain in New York, agus (c) méadú ar ghnáthchostaisí. Mar chithfear i Mírcheann F. 3, tá postas agus iompar méaduighthe ó £450 anuraidh go £615 i mbliadhna, de bharr fás na trádála. Tá costaisí taistil méaduighthe ó £25 go £240 mar tá se beartuighthe an Bainisteóir Conganta do chur go h-America, féachaint cionnus a b'fhearr an margadh annsúd d'aimsiúghadh agus do leatha. I Mírcheann F. 2 tá soláthar de £1,350 déanta chun sinn a bheith páirteach in Aonach an Domhain i New York. Meastar gur cheart margadh do bheith in Americe do bhréidín agus d'earraidhe lámhdhéanta, agus nár mhisde dul á lorg, le linn an Aonaigh. Tá láthair tógtha san Teasbáinteas le h-aghaidh bréidín, agus ceann eile le h-aghaidh earraidhe lámh-dhéanta. Sé tá beartuighthe ná, an teasbáinteas so do chómhnasca le teasbáintisí in sna tighthe móra gnótha i New York, Boston, Philadelphia agus cathaireacha eile: tá beartuighthe fógruidheacht do dhéanamh freisin.
B'ar éigin do b'fhiú an teasbáinteas ann féin, gan tathant do bheith dá dhéanamh ar na tighthe móra san am chéadna. Dá bhrígh sin, tá socruighthe comhairleóir teicniceach do chur go New York chun taighde do dhéanamh amease na tighthe gnótha, i dteannta an ghníomhaire, féachaint a bhféadfaí teangabháil do dhéanamh le tigh amháin aca san, nó níos mó. Ní féidir a rádh cad a thiocfaidh as an iarracht so, ach mar n-éirgheann leis, is deachair a rádh go n-éirgheodh le h-iarracht a déanfaí sa ghnáthslighe. I dteannta an méid seo atá luaidhte, deintear soláthar i Mírcheann F. 2 do sna gnáth-teasbáintí annso i mBaile Átha Cliath.
I ranna (1), (2) agus (3) do Mhírcheann S. tá comhartha-mhéide tógtha le h-aghaidh iasachtaí a cheapfadh an Roinn a bheith ceart agus cóir. I roinn (4) deintear soláthar d'iasacht a cuirfidh cala-bhád ar fagháil idir Dún na Séad agus Oileán Chléire. I Roinn (5) tá £100 a h-íocfaí le fear báid a dheanfadh seirbhís seasmhach do bhunúghadh idir an Daingean agus na Blascaoidí. Fé iasachta Ilghnéitheacha, tá £300 le cabhair i bhfuirm iasachta do sholáthar chun tionnsgail bheaga do bhunú no do chothú, ach an Roinn do bheith sásta le tairbhe gach iasacht acu. Ní gádh aon chur-síos do dhéanamh ar Mhírchinn H. 1 agus H. 2, mar is beag deifríocht atá idir figiúir na bliadhna so agus figiúirí na bliadhna atá caithte.
Tá laghdúghadh de £1,500 i Mírcheann H 3, ach ní h-ionann san agus a rádh go bhfuil aon ghearra anuas á dhéanamh ar obair na dtighthe. Ní'l ann ach iarracht ar theacht níos cruinne ar an méid is féidir do chaitheamh do réir taithighe na bliadhanta gabhtha tharainn. Tá fhíos ag Teachtaí ó'n nGaeltacht an sár-obair atá á dhéanamh fé scéim na dtighthe. Tá £346,262 íoctha mar deontaisí ó tháinig Acht na dTighthe (Gaeltacht), 1929, i bhfeidhm; tá 2,378 tighthe nua críochnuighthe agus 1,310 tighthe á gcúr suas: tá 1,879 tighthe feabhsuighthe agus 506 dá bhfeabhsughadh. Deintear, i rith bhadhna, idir 200 agus 350 tighthe d'fheabhsughadh agus idir 330 agus 420 tighthe nua do thógaint. Tá obair seo na dtighthe ag dul ar aghaidh go sásamhail, agus ní gádh domh-sa dul níos sia leis an sgéal.
Fá H. 4, tá suim airgid le h-aghaidh cásanna inar tugadh cead, tré míthuisgint, le cróite do thógaint agus d'fheabhsú, ach tá an méid ag dul i luighead, agus i gcionn bliadhain nó dhó ní bheidh gádh ar bith leis an soláthar seo. Chífear ó sna Leithreasaí-i-gCabhair go bhfuil súil le breis teacht-isteach, gur féidir a chur i gcoinnibh an breis soláthair atáthar á dhéanamh do cheannach abhar (Mírchinn D 6 agus D 8). Seasuigheann £34,000 tar éis na liúntaisí atá luaidhte do chur ar áireamh, agus fágann san go bhfuil súil le teacht-isteach de £55,900 ar fad. Níl an meastachán so ag dul i méid go mór ó bhliadhain go chéile, ach tá sé le rádh go bhfuil páighe an lucht oibre dulta i méid go mór—ó £6,906 i 1934-35 go £15,073 i 1937-38 agus timcheall £19,000 i 1938-39. Tá súil le £6,500 de theacht-isteach as 800 tonna ceilpe agus as 800 tonna feamainne. Tá súil le £1,000 de theacht-isteach as Biadh-Charraigín.
Ba mhaith liom mo bhuidheachas do ghabháil leis na Ranna eile Stáit atá tar éis congnamh do thabhairt uatha, go fonnmhar, domh-sa, agus do sna h-Oifigí atá i mbun Seirbhíse na Gaeltachta.