Údarás na Gaeltachta

Dáil Éireann Debate, Tuesday - 8 March 2022

Tuesday, 8 March 2022

Ceisteanna (228)

Aengus Ó Snodaigh

Ceist:

228. D'fhiafraigh Deputy Aengus Ó Snodaigh den Aire Turasóireachta, Cultúir, Ealaíon, Gaeltachta, Spóirt agus Meán cé atá ag riar an athbhreithnithe ar struchtúr Údaráis na Gaeltachta; ar éirigh leis an Roinn comhlacht comhairleoireachta a aimsiú chun tabhairt faoin athbhreithniú; agus an é an Roinn féin nó comhlacht comhairleoireachta a bhfuil an próiseas comhairliúcháin phoiblí á eagrú acu mar chuid den athbhreithniú, nó conas a dhéanfar measúnú ar an gcomhairliúchán poiblí; agus an ndéanfaidh sí ráiteas ina thaobh. [12958/22]

Freagraí scríofa

Minister of State at the Department of Tourism, Culture, Arts, Gaeltacht, Sport and Media (Deputy Jack Chambers)

D’fhógair mé ar an 16 Feabhra 2022 go raibh tús curtha ag mo Roinn le comhairiliúchán poiblí mar chuid den athbhreithniú ar an bpróiseas roghnúcháin/toghcháin i ndáil le Bord Údarás na Gaeltachta, a gealladh go ndéanfaí sa Chlár Rialtais.

Fágann sé seo go mbeidh an deis á tabhairt don phobal agus d’eagraíochtaí gur spéis leo, a dtuairimí agus a moltaí faoin ábhar a roinnt i scríbhinn leis an Roinn suas go  dtí 25 Márta 2022

Mar a d’fhógair mé an lá céanna tá mo Roinn  ag obair, i gcomhar leis an Oifig um Sholáthar Poiblí, chun sainchomhairleoireacht a cheapadh le hanailís agus athbhreithniú a dhéanamh ar an ábhar agus moltaí ina leith a sholáthar don Roinn maidir leis an gcur chuige roghnúcháin/toghcháin is fearr don todhchaí. Cuirfear san áireamh moltaí agus tuairimí faoin ábhar a fhaightear de thoradh an phróisis chomhairliúcháin phoiblí i dtreo an obair ar fad a bheith críochnaithe i mí Iúil 2022 nó mar sin.