An Seanad ag Féachaint Chun Cinn: Taispeántas

Cinntíonn an ról nua seo go ndéanfar Rialacháin a thugann éifeacht do Threoracha AE a iniúchadh sula síníonn Airí isteach i ndlí na hÉireann iad. Cinntíonn sé chomh maith go seachnófar fíneálacha a bheadh á dtabhú mar gheall ar chur i bhfeidhm mall na rialachán.

Cuirfidh an Seanad feabhas ar an iniúchadh seo trí Choiste Roghnóireachta an tSeanaid, a mbeidh ról formhaoirseachta aige i ndáil le treoracha ón AE.

Ghlac an Seanad le rialacha nua le gairid freisin chun a athbhreithniú ar mholtaí a rinneadh i dtuarascálacha choistí an Oireachtais a neartú. Féadfaidh an Teach cuireadh a thabhairt anois do Chathaoirleach coiste atá ina theachta Dála labhairt ag suí den Seanad ar rún a bhaineann le tuarascáil choiste.

Féadfaidh an Seanad anois freisin díospóireacht a dhéanamh ar rún breise chun dul chun cinn ar chur i bhfeidhm mholtaí an choiste a athbhreithniú tar éis sé mhí. Cuidíonn sin tuilleadh airde a tharraingt ar an obair luachmhar atá á déanamh ag na coistí agus tugann spreagadh do ranna Rialtais tuilleadh airde a thabhairt ar a gcuid moltaí.

Ar an 12 Iúil 2022, gaireadh an Buanordú nua seo chun díospóireacht a dhéanamh ar thuarascáil dheireanach an Chomhchoiste um na Príomhcheisteanna a mbíonn Tionchar acu ar an Lucht Siúil.

Ag seoladh chlár comórtha Seanad100, labhair an t-iarUachtarán agus an t-iarSheanadóir Máire Mhic Róibín faoin gá atá le haird níos mó ar shaincheist an athraithe aeráide.  Dúirt sí go bhfuiltear ag caitheamh leis an ngéarchéim aeráide mar a bheadh saincheist mhionlaigh ann agus nach mór í a phlé ag leibhéal an phobail agus ag leibhéal náisiúnta. Spreag sé sin líon ócáidí poiblí tábhachtacha ar Ghníomhú ar son na hAeráide i seomra an tSeanaid.

I Meán Fómhair 2022, labhair Feisirí de Pharlaimint na hEorpa sa Seanad, agus bhí Gníomhú ar son na hAeráide i measc na saincheisteanna a pléadh. Thug an Cathaoirleach gealltanas ina dhiaidh sin go ndíreodh rannpháirtíocht le Feisirí de Pharlaimint na hEorpa le linn théarma seo an tSeanaid ar ghníomhú ar son na hAeráide agus ar cheartas aeráide, lena n-áirítear freagra an AE ar na saincheisteanna sin. Áiríodh ar ábhair na díospóireachta iarmhairtí ar éigeartas aeráide agus na hathruithe atá de dhíth in earnálacha ar leith lena n-áirítear na hearnálacha talmhaíochta, tógála agus taistil.

Tionólann Coiste Comhairliúcháin Phoiblí an tSeanaid éisteachtaí poiblí ar réimsí a bhaineann le cumhachtaí reachtacha Sheanad Éireann agus beartas poiblí. Tá ocht gcinn de thuarascálacha foilsithe aige ón mbliain 2012 agus is saincheisteanna mionlaigh a pléadh in go leor acu.  Bhí a chéad chruinniú ag Coiste reatha Comhairliúcháin Phoiblí an tSeanaid ar Thodhchaí Bhunreachtúil Oileán na hÉireann ar an 30 Meán Fómhair 2022.  Le linn éisteachtaí éagsúla tá cluas tugtha aige do ghuthanna grúpaí óige, daoine aonair agus coistí, lucht acadúil agus Guthanna an Tuaiscirt ar bhonn uilechoiteann.