Díospóireachtaí

Maidir leis an Tuairisc Oifigiúil

Cathain a fhoilsítear díospóireachtaí?

Foilsítear díospóireachtaí na Dála de réir a chéile i rith lá suí. Déantar na himeachtaí go léir a tharlaíonn roimh 7 p.m. a fhoilsiú roimh mheán oíche, agus foilsítear an chuid eile an lá arna mhárach.

Foilsítear díospóireachtaí an tSeanaid de réir a chéile i rith lá suí, agus foilsítear aon imeacht atá fágtha an lá arna mhárach.

De ghnáth, foilsítear an Tuairisc Oifigiúil maidir le gach cruinniú coiste laistigh de dhá nó trí lá oibre tar éis suí ach bíonn an méid sin ag brath ar líon agus fad na gcruinnithe coiste in aon seachtain ar leith.

Maidir le ceisteanna a chuireann Comhaltaí lá ar leith le haghaidh freagra i scríbhinn ó na hAirí, is iondúil go bhfoilsítear iad laistigh de dhá lá oibre.

Cad atá i gceist le díospóireachtaí parlaiminte?

Is éard atá i gceist le ‘Tuairisc Oifigiúil’ díospóireachtaí parlaiminte tuairisc na Dála, an tSeanaid agus imeachtaí coistí.

Is prionsabal de chuid an daonlathais parlaiminte é gur cheart imeachtaí a thionól go poiblí agus gur cheart taifead a fhoilsiú.

Is taifead údarásach ar imeachtaí poiblí í an Tuairisc Oifigiúil de chuid Thithe an Oireachtais agus coistí parlaiminteacha. Cuimsíonn sí ceisteanna parlaiminte ó bhéal agus i scríbhinn. I mBuan‑Orduithe Thithe an Oireachtais luaitear gur cheart díospóireacht ar gach suí a fhoilsiú.

In amanna, foilsítear eagráin speisialta den Tuairisc Oifigiúil chun imeacht nó ócáid a cheiliúradh, amhail an comóradh céad bliain in 2019 ar an gcéad suí de Dháil Éireann an 21 Eanáir 1919 nó an t‑aitheasc ón Uachtarán John F. Kennedy an 28 Meitheamh 1963. 

Cén áit ar féidir liom teacht ar an Tuairisc Oifigiúil?

Is féidir teacht ar an Tuairisc Oifigiúil ó 1919 go dtí an lá atá inniu ann inár dtaisclann de dhíospóireachtaí parlaiminte. Féadfar cuardaigh dhíospóireachta a bheachtú freisin de réir an Tí, amhail an Dáil agus an Seanad, agus an coiste.

Is ann freisin do thaifead ar vótálacha, nó vótaí inchuardaithe, a thógtar sna Tithe nó sna coistí. Féadfar ceisteanna parlaiminte a chuardach nó a fhiosrú go físiúil. 

Cuirtear imleabhair cheangailte phriontáilte de dhíospóireachtaí na Dála agus an tSeanaid le chéile freisin agus is féidir teacht orthu i leabharlanna cóipchirt.

An bhfuil an Tuairisc Oifigiúil ina cuntas focal ar fhocal?

Tuairisc iomlán agus neamhchlaonta ar ionchuir na gcainteoirí go léir atá sa Tuairisc Oifigiúil; tuairisc focal ar fhocal atá inti den chuid is mó ach ní go hiomlán toisc go nglactar leis go gcaitear beagán eagarthóireachta a dhéanamh ar an bhfocal ó bhéal ar mhaithe leis an té a bheadh á léamh seachas an té a bheadh ag éisteacht.

Is minic a dhéantar de réir na treoirlíne ó Erskine May le tuairisciú parlaiminte, lena sainítear a bhfuil agus nach bhfuil i gceist leis na díospóireachtaí parlaiminte:

Is éard atá i gceist leis an Tuairisc Oifigiúil tuairisc iomlán sa chéad phearsa, de chuid na gcainteoirí uile, agus is é an sainmhíniú ar thuairisc iomlán tuairisc cé nach tuairisc focal ar fhocal í, ar tuairisc focal ar fhocal í den chuid is mó, ach a mbeadh aon athrá agus aon iomarcaíocht fágtha ar lár agus aon earráid shoiléir ceartaithe inti, ach ar an lámh eile, nach mbeadh aon rud fágtha ar lár a chuireann le ciall na hóráide nó a léiríonn an argóint.

Cad é ról Oifig na nDíospóireachtaí?

Tá Oifig na nDíospóireachtaí freagrach as an Tuairisc Oifigiúil a chur le chéile.

Tá Oifig na nDíospóireachtaí faoi stiúir Phríomhthuairisceoir agus Phríomheagarthóir na nDíospóireachtaí agus foireann de leaseagarthóirí, eagarthóirí cúnta, tuairisceoirí parlaiminte agus foireann riaracháin. Earcaíonn an tSeirbhís um Cheapacháin Phoiblí tuairisceoirí parlaiminte i gcomórtais oscailte. Tá cáilíochtaí iarchéime ag roinnt mhaith dár gcuid foirne, lena n‑áirítear go leibhéal PhD.

Earcaíonn an oifig dhá rolla, ceann i mBéarla amháin agus ceann dátheangach – Gaeilge agus Béarla – chun saineolas i nGaeilge agus i mBéarla a chinntiú.

Conas a chuirtear an Tuairisc Oifigiúil le chéile?

Ón tráth a bunaíodh an Stát, d’úsáid tuairisceoirí gearrscríbhneoireacht agus dheachtaigh siad an tuairisc d’fhoireann clóscríobhaithe, agus ina dhiaidh sin seoladh an tuairisc chuig clódóirí seachtracha lena foilsiú. D’athraigh an próiseas tuairiscithe sin in 1993 agus taifeadtar imeachtaí go digiteach anois agus cuireann foireann Oifig na nDíospóireachtaí le chéile iad ar shuíomh gréasáin an Oireachtais agus foilsíonn sí iad.

I ngnáthlá, sanntar foireann tuairisceoirí amháin don Dáil agus sanntar foireann eile don Seanad agus do na coistí. Glacfaidh comhaltaí de gach foireann seal chun deich nóiméad a chaitheamh sa Seomra agus cuntas a choinneáil ar na cainteoirí agus ar an ngnó a dhéantar. Is iondúil go bhfilleann siad ar a stáisiúin oibre ansin agus, agus úsáid á baint as an gcomhad digiteach fuaime, go gcuireann siad an tuairisc ar na deich nóiméad sin le chéile. Ansin, déanann an fhoireann eagarthóireachta eagarthóireacht ar an obair, tiomsaíonn agus foilsíonn sí í.

Tum isteach ar bhealach níos doimhne ann ach breathnú ar lá sa saol de chuid Oifig na nDíospóireachtaí.

Ag tagairt don Tuairisc Oifigiúil

Tagairt stairiúil

Foilsíodh díospóireachtaí stairiúla i dtosach i leabhair laethúla fhisiciúla de dhíospóireacht agus imleabhair cheangailte, ina raibh uimhreacha colúin a úsáideadh chun críoch tagartha. Agus úsáid á baint as stíl tagartha Harvard, mar shampla, féadfar tagairt don Tuairisc Oifigiúil mar a leanas do dhíospóireacht ó 2005:

McGrath, Paul, Díospóireachtaí na Dála, Iml. 600, Uimh. 5, col. 1602‑1604, an 20 Aibreán 2005

(Cainteoir, Imleabhar na Díospóireachta agus Uimh. an leabhair, Uimhreacha an cholúin, Dáta na hóráide)

Tagairtí colúin

Coinníodh tagairtí colúin i leaganacha digiteacha agus ar líne den Tuairisc Oifigiúil go dtí 2012, tráth a scoireadh den chleachtas maidir le tagairtí colúin a áireamh ar líne. Tá uimhreacha colúin nó leathanaigh fós ar fáil chun críoch lua in imleabhair cheangailte tráth foilsithe nó sa leagan PDF leictreonach de dhíospóireachtaí laethúla a fhoilsítear ar líne, agus is iondúil go mbíonn siad le fáil ar chlár ábhar gach díospóireachta laethúla. Mura bhfuil an PDF ar fáil do dhíospóireachtaí stairiúla, is féidir go mbeifear in ann sonraí tagartha colúin a aisghabháil ar ár suíomh cartlannaithe de dhíospóireachtaí an Oireachtais.

Lua den Tuairisc Oifigiúil ar líne

Foilsítear an Tuairisc Oifigiúil ar líne ar an gcéad ásc, ar an lá suí céanna de ghnáth nó go luath ina dhiaidh sin. Mura bhfuil aon tagairt cholúin ná leathanaigh ar fáil, féadfar tagairt a dhéanamh don díospóireacht i gcomhréir leis an stíl d’acmhainn ar líne. Agus úsáid á baint as stíl tagartha Harvard, mar shampla, féadfar tagairt a dhéanamh don Tuairisc Oifigiúil mar a leanas do dhíospóireacht ó 2024:

McDonald, M.L., (2024), Díospóireachtaí na Dála (Gan athbhreithniú), [ar líne], an 21 Feabhra 2024, Le fáil ar: https://www.oireachtas.ie/ga/debates/debate/dail/2024-02-21/9/ (arna rochtain an 22 Feabhra 2024)

(Sloinne (sloinnte), Iniseal (inisealacha). (Bliain an fhoilsithe), [An cineál Tí nó Coiste] Díospóireachtaí (Gan athbhreithniú), [ar líne], dáta. Ar fáil ag: seoladh an tsuímh gréasáin (dáta rochtana)

Sonraí oscailte

Is éard a bhí i gceist le hathfhorbairt shuíomh gréasáin an Oireachtais, athbhreithniú críochnúil ar na formáidí sonraí a bhí á bhfoilsiú ar ár suíomh gréasáin d’fhonn ailíniú a dhéanamh le caighdeáin idirnáisiúnta. Ailíníodh sonraí na ndíospóireachtaí go léir le caighdeán XML idirnáisiúnta Akoma Ntoso do shonraí parlaiminteacha, lena gcinntítear gur féidir le húsáideoirí na APInna sonraí oscailte dár gcuid oibriú le sonraí bailí, struchtúrtha.

Foilsítear gach díospóireacht i bhformáid XML, amhail an sampla seo, le tacsanomaíocht aonfhoirmeach, mar an bunús lena foilsiú chuig an ngréasán agus i gcóip chrua. Leis na hAPInna sonraí oscailte dár gcuid, is féidir le húsáideoirí tacair sonraí a bhaineann le díospóireachtaí, vótálacha (vótaí) agus ceisteanna parlaiminte, i measc acmhainní eile, a rochtain i bhformáid mheaisín‑inléite.