An Comhchoiste um Iompar agus Cumarsáid chun bualadh leis an Aire Ossian Smyth chun cibearshlándáil a phlé agus le Fórsa chun fógra Aer Lingus maidir leis na bunáiteanna i Sionainn agus i gCorcaigh a phlé

Déanfar an cruinniú, a bheidh ar siúl ag 12.30pm i Seomra Coiste 2 i dTeach Laighean, a roinnt ina dhá sheisiún:

12.30-1.30pm – Ossian Smyth, TD, Aire Stáit ag an Roinn Caiteachais Phoiblí agus Athchóirithe, le cibearshlándáil a phlé; agus

1.30-2.30pm – Ionadaithe ó cheardchumann Fórsa chun plé a dhéanamh ar shaincheisteanna a bhfuil tionchar acu ar fhoireann chábáin agus fógraí a rinne Aer Lingus le déanaí.

Dúirt Cathaoirleach an Choiste, an Teachta Kieran O’Donnell, an méid seo a leanas: “Cuireann an Coiste fáilte roimh an gcruinniú seo leis an Aire Ossian Smyth agus táimid ag tnúth go mór le cloisteáil uaidh agus nuashonrú a fháil ar an gcibearionsaí a rinneadh ar FSS agus ar ár straitéis cibearshlándála náisiúnta.

“Sa dara seisiún a bheidh againn, buailfimid le hionadaithe ó cheardchumann  Fórsa chun plé a dhéanamh ar shaincheisteanna a bhfuil tionchar acu ar fhoirne cábáin Aer Lingus, i ndiaidh an fhógra a tháinig ón gcuideachta le déanaí  maidir leis na bunáiteanna atá lonnaithe i Sionainn agus i gCorcaigh.”

Tá 14 Chomhalta ag an gComhchoiste um Iompar agus Cumarsáid, naonúr comhaltaí ón Dáil agus cúigear ón Seanad.

Is féidir an cruinniú i Seomra Coiste 2 a fheiceáil beo ar Oireachtas.ie.

Is féidir breathnú ar imeachtaí an Choiste ar Aip Fón Cliste Thithe an Oireachtais, atá ar fáil d’fhearais Apple agus Android.