Tiocfaidh an Comhchoiste Oireachtais um Ealaíona, Spórt agus Meáin le chéile chun sásraí réitigh coinbhleachta neamh-chúirt-bhunaithe chun déileáil le gearáin maidir leis na meáin a phlé

Cloisfidh an cruinniú ionadaithe uathu seo a leanas:

• Local Ireland
• NewsBrands Ireland
• Ceardchumann Náisiúnta na nIriseoirí
• Comhairle Preasa na hÉireann agus Oifig an Ombudsman Preasa
• Craoltóirí Neamhspleácha na hÉireann

Ag labhairt di roimh an gcruinniú, dúirt Cathaoirleach an Choiste, an Teachta Niamh Nic Gabhann TD “Beidh deis ag an gCoiste ag ár gcruinniú amárach plé a dhéanamh leis na comhlachtaí sin a ndéanann na sásraí réitigh coinbhleachta atá i bhfeidhm i láthair na huaire chun déileáil le gearáin maidir leis na meáin difear dóibh. Tugaimid dár n-aire gur mhol ár gcomhleacaithe ar an gComhchoiste um Dhlí agus Ceart trína Ghrinnscrúdú Réamhreachtach ar Scéim Ghinearálta an Bhille um Chlúmhilleadh (Leasú) go ndéanfaí breithniú ar scrúdú mór-dhíobhála a thabhairt isteach le haghaidh gach cáis clúmhillte.

Tá ár gCoiste tiomanta le tamall do shaor-phreas in Éirinn agus don chéanna a spreagadh agus a chur chun cinn. Is eol dúinn a thábhachtaí atá an preas ó thaobh fheidhmiú an daonlathais agus shochaí na hÉireann agus táimid tar éis cruinnithe a thionól ar shaincheisteanna fad-réimse a bhaineann le todhchaí na meán uile le leas-sealbhóirí éagsúla as gach cearn den tíre.

Tá sé beartaithe againn léiriú soiléir a fháil ó na hionadaithe a bheidh i láthair amárach ar chúrsaí mar atá faoi láthair agus ar na hathruithe ar mhaith leo go gcuirfí i bhfeidhm iad.

Is féidir an cruinniú ar 1.30 p.m. a fheiceáil beo ar Oireachtas TV

Léigh tuilleadh faoi obair an Chomhchoiste um Thurasóireacht, Cultúr, Ealaíona, Spórt agus Meáin

Is féidir imeachtaí an Choiste a fheiceáil ar Aip Fóin Chliste Thithe an Oireachtais, atá ar fáil ar ghléasanna Apple agus Android, freisin.