Comhchoiste na Gaeilge, na Gaeltachta agus Phobal Labhartha na Gaeilge ag féachaint ar na gnéithe éagsúla agus neamhchoitianta arbh fhéidir ábhair Ghaeilge a chur ar fáil don phobal tríothú

Dúirt Cathaoirleach an Choiste, an Teachta Dála Aengus Ó Snodaigh: “Beidh ionadaithe thar ceann Leabharlann Náisiúnta na hÉireann os comhair an Chomhchoiste agus beidh na Comhaltaí ag tnúth leis na hacmhainní atá ar fáil sa Leabharlann, mar aon le conas is féidir na hacmhainní sin a chur ar fáil don phobal i gcoitinne, idir chruachóipeanna agus rochtain ar líne, a phlé leo.

“Chomh maith leis sin, beidh ár mbreithniú á dhéanamh againn ar na roghanna éagsúla, cuir i gcás greannáin, leabhair crosfhocal, leabhair cuardaigh focal, srl, trínarbh fhéidir ábhair Ghaeilge a chur ar fáil don phobal agus a chur ar fáil do dhaoine nach léann leabhair Ghaeilge de ghnáth, agus beidh ionadaithe thar ceann Coimicí Gael agus Ruaille Buaille, thar ceann Dalen Éireann, thar ceann www.cluiche.ie agus thar ceann www.siopaudar.ie, siopa Ghlór na nGael ar-line, ag an gcruinniú chun na féidearthachtaí sin a phlé linn.”

Tá 14 Chomhalta, naonúr ó Dháil Éireann agus cúigear ó Sheanad Éireann, mar Chomhaltaí den Chomhchoiste: Comhchoiste na Gaeilge, na Gaeltachta agus Phobal Labhartha na Gaeilge. Is féidir an cruinniú, i Seomra Coiste 4 a fheiceáil beo ar Teilifís an Oireachtais.

Chomh maith leis sin, is féidir imeachtaí an Chomhchoiste a fheiceáil ar aip fhónchliste Thithe an Oireachtais, a bhfuil ar fáil ó ghléasanna Apple agus Android.